வருமான வரியிலும் சேமிக்கலாம்... இப்படி!

''வருமான வரி செலுத்துவது என்பது, ஒவ்வொரு குடிமகனின் கடமை. அதேபோல, வருமான வரிவிலக்குப் பெறுவதும், அதற்குத் தகுதியானவர்களின் உரிமை. ஆனால், பலரும் அதை பயன்படுத்திக்கொள்ளும் வழியை அறியாமல், பின்பற்றாமல், ஆண்டு இறுதியில் கிட்டத்தட்ட தங்களின் ஒரு மாதச் சம்பளத்தை வரியாகச் செலுத்துகிறார்கள்'' என்று சுட்டிக்காட்டும் சென்னை, தாம்பரத்தைச் சேர்ந்த ஆடிட்டர் எஸ்.சதீஷ்குமார், வருமான வரிவிலக்குப் பெறும் முறைகளை விரிவாக விளக்குகிறார்...

கல்விக்கடன் அல்லது கல்விக் கட்டணம்
(UNDER SECTION 80C)

''பிள்ளைகளின் பள்ளி மற்றும் கல்லூரிக் கட்டணங்களை முன்னிறுத்தி, பெற்றோருக்கு வருடத்துக்கு ` 1.5 லட்சம் வரை வரிவிலக்கு உண்டு. இரண்டு பிள்ளைகள் எனில், கணவன் ` 1.5 லட்சத்துக்கும், மனைவி ` 1.5 லட்சத்துக்கும் என தனித்தனியாக மொத்தம் மூன்று லட்சத்துக்கு வரிச்சலுகை பெற முடியும். இரண்டுக்கு மேற்பட்ட பிள்ளைகளின் கல்விக்கட்டணங்களுக்கு வரிச்சலுகை கிடையாது.
மாணவர் பெயரில் பெறப்படும் வங்கிக் கடனுக்கான வட்டிக்கும், SECTION 80E-ன்படி வரி விலக்கு உண்டு. இதற்கு வரம்பு இல்லை, எவ்வளவு ரூபாய் வட்டி செலுத்துகிறோமோ அனைத்தையும் வரிவிலக்குக்கு எடுத்துக்கொள்ளமுடியும். கடன் பெற்றதில் இருந்து ஏழு வருடங்கள் வரை இதை பெற முடியும்.

பயணத்துக்கான (சுற்றுலா) வரிவிலக்கு
(LTC - Leave Travel Concession - 10(5) செக்‌ஷன்)

ஒவ்வொரு வருடமும், ஏப்ரல் முதல் மார்ச் வரை (உதாரணம்: 2016 ஏப்ரல் முதல் 2017 மார்ச்), LTC கணக்கு முடிக்கப்படுகிறது. பயணத்துக்கான செலவுகளை நான்கு வருடத்துக்கு ஒருமுறை வரிவிலக்குக்காக க்ளெய்ம் செய்யலாம். ஒருவேளை, நான்கு வருடங்களில் சுற்றுலா செல்ல முடியாமல் இருந்திருந்தால், அதை சமன் செய்ய, அடுத்த நான்கு வருடத்தின் முதல் வருடத்தில் சுற்றுலா சென்று, க்ளெய்ம் செய்ய முடியும். கூடவே, வரவிருக்கும் நான்கு வருடத்துக்கான வாய்ப்பையும் பயன்படுத்திக் கொள்ளலாம்.
இந்த சலுகையைப் பெறுவதற்கான விதிமுறைகள் சிலவற்றைப் பார்ப்போம். வெளிநாடு செல்ல அனுமதி இல்லை. இந்தியாவுக்குள் எங்கும் பயணம் செய்யலாம். ரயில், விமானம், பேருந்து டிக்கெட்டுகளை மட்டுமே சமர்ப்பிக்க முடியும். கார், கால் டாக்ஸி, ஷேர் ஆட்டோ, தங்கும் விடுதி, உணவுச் செலவுகள் இதில் சேர்க்கப்பட மாட்டாது. அனைத்தையும் ஒரிஜினல் ரசீதுகளாகச் சமர்ப்பிக்க வேண்டியது அவசியம். LTC க்ளெய்முக்கு கட்டாயமாக மெடிக்கல் லீவில் போகமுடியாது. பெற்றோரைச் சார்ந்திருக்கும் இரண்டு குழந்தைகளை உடன் அழைத்துச் செல்லலாம். ஒருவேளை இரண்டாவது டெலிவரியில் இரட்டைக் குழந்தை எனில், மூன்று குழந்தைகளுக்கு அனுமதி உண்டு.
வேலைக்குச் செல்லும் பிள்ளைகள்/திருமணமான பிள்ளைகளின் செலவுகளை வரிவிலக்குக்குச் சமர்ப்பிக்க முடியாது. இன்னொரு முக்கியமான விஷயம்... கணவன், மனைவி இருவரும் ஒரே ரசீதுகளை வரிவிலக்குக்குப் பயன்படுத்த முடியாது. எனவே, யார் பெயரில் க்ளெய்ம் செய்ய வேண்டுமோ, டிக்கெட் பதிவுகளை அவர் பெயரிலேயே செய்ய வேண்டும்.

ஹெல்த் இன்ஷூரன்ஸ் (மெடிக்கல் இன்ஷூரன்ஸ்) பிரீமியத்துக்கான வரிவிலக்கு
- UNDER SECTION 80 D):

மெடிக்கல் இன்ஷூரன்ஸுக்காக நீங்கள் செலுத்தும் பிரீயமித்தொகைக்கு வரிவிலக்கு உண்டு. உதாரணமாக, ஒரு குடும்பத் தலைவன் இரண்டு லட்சம் ரூபாய் மெடிக்கல் இன்ஷூரன்ஸ் பாலிசி எடுத்து, வருடத்துக்கு சீனியர் சிட்டிசன்களான தன் பெற்றோருக்கு 20,000 ரூபாயும்... தான், தன் மனைவி, குழந்தைகள் என தன் குடும்பத்துக்கு 15,000 ரூபாயும் (2015 பட்ஜெட்டில் மூத்த குடிமக்களுக்கு ` 30 ஆயிரம், மற்றவர்களுக்கு ` 25 ஆயிரம் என உயர்த்தப்பட்டுள்ளது) ஹெல்த் இன்ஷூரன்ஸ் (மெடிக்கல் இன்ஷூரன்ஸ்) பிரீமியமாகக் கட்டி வருகிறார் என்று வைத்துக்கொள்வோம். இதற்கான பில்களை வரிவிலக்குக்கு சமர்ப்பிக்கலாம்.

ஆயுள் காப்பீடு பிரீமியத்துக்கான (லைஃப் இன்ஷூரன்ஸ்) வரிவிலக்கு - 80 சி

ஆயுள் காப்பீட்டு நிறுவனத்தில் நீங்கள் எடுத்துள்ள பாலிசிக்காக கட்டிவரும் பிரீமியத் தொகைக்கு வருமான வரிவிலக்கு உண்டு. உதாரணமாக, 10 லட்ச ரூபாய் பாலிசிதாரராகச் சேர்கிறீர்கள் என்றால், அதன் பிரீமியத் தொகையை குறிப்பிட்ட மூன்று மாதங்கள், ஆறு மாதங்கள், வருடம் ஒரு முறை என்று வசதியைப் பொறுத்து செலுத்தி வரலாம். அதற்குரிய வருமான வரி விலக்கு உண்டு. உதாரணமாக, சிங்கிள் பிரீமியம் எனும் வகையில் அந்த 10 லட்சத்தையும் ஒரே தொகையாகக் கட்டுகிறவர்கள், இதில் 10% (`1 லட்சம்) வரிவிலக்குப் பெறலாம். ஆனால், அதற்கான வருமான வழிகளை சரியாகச் சமர்ப்பிக்கவில்லை எனில், வருமானத்துக்கு அதிகமாக பிரீமியம் கட்டப்பட்டிருந்தால், 30% வருமான வரி கட்ட வேண்டிவரும்.

கணவனின் வருமானத்தை, மனைவியின் பெயரில் சேமிக்கலாமா?

மாதந்தோறும் கட்டும் பிரீமியத் தொகையை மனைவிக்கு... கணவன், கணவனுக்கு... மனைவி, பெற்றோருக்கு... மகன் என வருமானம் பெறும் எவரும், பிறர் பெயரில் செலுத்தி, அந்தத் தொகைக்கான வரிவிலக்கைப் பெற்றுக்கொள்ளலாம். அதில் கவனிக்க வேண்டிய விஷயம், கணவர் மாதம் 20 ஆயிரம் ரூபாய் வருமானம் பெறுகிறார் என்றால், மனைவிக்கு மூவாயிரம் அல்லது ஐயாயிரம் போன்று சிறிய தொகையைத்தான் பிரீமியமாகக் கட்ட வேண்டும். தன் வருமானத்தை தாண்டி, மனைவியின் பெயரில் முதலீடு செய்தால், வருமானம் எங்கிருந்து வந்தது என்கிற கேள்வி எழுப்பப்படும். எனவே, கணவன் மனைவிக்கு பிரீமியம் செலுத்தி வந்தால் கணவன் பெயரிலேயே காண்பிக்க வேண்டும்'' என்று தகவல்கள் தந்த சதீஷ்குமார், ``வரிவிலக்கை பயன்படுத்திக்கொள்ளுங்கள்!'' என்று விடை கொடுத்தார்.

வரி... சில வரிகள்!

2014-ல் இருந்து ஆண், பெண் பாகுபாடின்றி இருபாலரும் தங்களின் வருட ஊதியம் 2.5 லட்ச ரூபாய்க்கும் மேல் போனால் வரிசெலுத்தி ஆகவேண்டும் என்பது கட்டாயம். இதில் பெண்களுக்கென எந்தவித வரிச்சலுகையும் கிடையாது.
ஒரு நிறுவனத்தில் பணிபுரியும்போது, உதாரணத்துக்கு 15,000 ரூபாய் சம்பளதாரருக்கு, நிறுவனம் 1,500 ரூபாயும், சம்பளதாரர் 1,500 ரூபாயும் எதிர்கால ஓய்வூதியத்துக்கு செலுத்தி வர வேண்டும். இதுதான் பிராவிடண்ட் ஃபண்ட் எனப்படும் பி.எஃப். இதில் நிறுவனம் செலுத்தும் தொகைக்கு வரிவிலக்கு இல்லை. ஆனால், சம்பளதாரர் செலுத்தும் தொகை 1.5 லட்சத்துக்குள் செலுத்தும்வரை வரிவிலக்கு உண்டு.
சுயதொழில் செய்பவர்கள், அஞ்சலகத்தில் பப்ளிக் பிராவிடண்ட் ஃப்ண்ட் மூலமாக பணம் செலுத்தி, 1.5 லட்சம் வரை வரி விலக்குப் பெறலாம்.
80 சி ஃபிக்சட் டெபாசிட் ஸ்கீம் (நிரந்தர வைப்பு நிதி - 80C fixed deposit scheme):  இந்த ஸ்கீம் வழியாக டெபாசிட் செய்து வரும் பணத்தை ஐந்து வருடம் வரை இடையில் எடுக்க முடியாது. இதற்கும் அதிகபட்ச தொகையாக ஒரு வருடத்துக்கு 1.5 லட்சம் ரூபாய் வரி விலக்கு உண்டு (பள்ளி மற்றும் கல்லூரிக் கட்டணம், பிராவிடண்ட் ஃபண்ட், இன்ஷூரன்ஸ் பிரீமியம் இவை அனைத்தையும் சேர்த்து).

காலக்கெடு

பொதுவாக வருமானவரிக் கணக்கை ஒவ்வொரு வருடமும் ஜூலை 31-ம் தேதிக்குள் தாக்கல் செய்ய வேண்டும். இந்த ஆண்டு ஆகஸ்ட் 31-ம் தேதி வரை காலக்கெடு நீட்டிக்கப்பட்டுள்ளது.

http://pettagum.blogspot.in/2015/08/blog-post.html

--

இது என் இறைவனின் அருட்கொடையிளிருந்து அருளப்பட்டதுwww.sahabudeen.com

கேஸ் சேஃப்டி டிவைஸ்... கிச்சனின் காவலன்!

வீட்டில் பயன்படுத்தும் சமையல் எரிவாயு தொடர்பான பாதுகாப்பு நடவடிக்கைகள் குறித்து எழும் சந்தேகங்களுக்கு விளக்கம் தருகிறார், 'கேஸ் சேஃப் இந்தியா பப்ளிக் லிமிடெட்'-ன் சென்னை டீலர் தினேஷ்.
"கேஸ் சிலிண்டர் வெடிக்க என்ன காரணம்?''
''90% சிலிண்டர் விபத்துகள் கேஸ் லீக் ஆவதால்தான் ஏற்படுகின்றன. எனவே, கேஸ் லீக்கேஜுக்கான வாய்ப்பில்லாமல் கவனமாக இருக்க வேண்டும். கேஸ் லீக்கேஜை உணர்ந்தால், துரிதமாக நடவடிக்கை எடுக்க வேண்டும்.''
''கேஸ் சிலிண்டரை கையாளும் முறைகள் பற்றி...''
''சிலிண்டரை எப்போதும் நிமிர்த்தியே வைத்திருக்க வேண்டும்; படுத்த நிலையில் வைக்கக் கூடாது. மேலும், சிலிண்டர் வைக்கும் இடத்தில் பாத்திரம் பண்டம், தேவையற்ற பொருட்களை நிரப்பி வைப்பது என்று நெருக்கடியை ஏற்படுத்தக்கூடாது. சிலிண்டரைவிட அடுப்பு சற்று உயரமான இடத்தில் இருப்பதுடன், சிலிண்டரையும், அடுப்பையும் இணைக்கும் ரப்பர் டியூப் வெடிப்பு, விரிசல் போன்ற பழுதின்றி இருக்க வேண்டியது அவசியம். எப்போதுமே ஐ.எஸ்.ஐ முத்திரை பெற்ற அடுப்பு, டியூப், லைட்டர் போன்றவற்றையே பயன்படுத்த வேண்டும்.''
''சிலிண்டரையும் அடுப்பையும் இணைக்கும் ரப்பர் குழாயை எத்தனை மாதங்களுக்கு ஒருமுறை மாற்ற வேண்டும்?''
''க்ரீன் ஃபிளெக்ஸிபிள் டியூப் என்றால் 6 மாதம் முதல் 1 வருடத்துக்கு ஒருமுறை மாற்றலாம். ஆரஞ்ச் சுரக்‌ஷா டியூப் என்றால் 1 முதல் 1.5 ஆண்டுகளுக்கு ஒருமுறை மாற்றலாம். இடைப்பட்ட காலத்தில் விரிசல் ஏற்பட்டால், உடனடியாக மாற்றிவிட வேண்டும்.''
''சமையல் அறையில் அதிக மின்சாரம் இழுக்கும் ஃப்ரிட்ஜ் போன்ற உபகரணங்களை வைக்கலாமா?''
''அதை அந்த மின்சார சப்ளையை பொறுத்துதான் முடிவு செய்ய முடியும். எனினும், அடுப்புக்கு மிக அருகில் எலெக்ட்ரிக் பொருட்களை வைப்பது எப்போதுமே தவிர்க்கப்பட வேண்டிய விஷயம்.''

''சிலிண்டர் வைத்திருக்கும் இடத்தை கதவு போட்டு மூடி வைக்கலாமா?''
''கூடாது. கேஸ் லீக் ஆனால் அது வெளியே தெரிவதற்கான வாய்ப்பை இது குறைக்கும் என்பதால், எப்போதுமே சிலிண்டரை கண்பார்வையில், காற்றடைக் காத வகையிலேயே வைத் திருக்க வேண்டும்.''
''கேஸ் லீக் ஆவது தெரிந்தால் என்ன செய்ய வேண்டும்?''
''முதலில் அடுப்பையும், ரெகுலேட்டரையும் ஆஃப் செய்துவிட வேண்டும். மின் பொருட்களின் ஸ்விட்ச் எதையும் ஆன் செய்துவிடக் கூடாது. ஆஃப் செய்யவும் கூடாது. கதவு, ஜன்னல்களை திறந்துவைத்துவிட்டு, வீட்டில் உள்ளவர்கள் வெளியேற வேண்டும். தாமதிக்காமல் அருகில் இருக்கும் கேஸ் டீலரை அழைக்க வேண்டும்.''
''சிலிண்டரின் எடை சரியாக இருக்கிறதா என்று எப்படி கண்டறிவது?''
''அதற்கான பிரத்யேக வெயிங் மெஷினை, டெலிவரிக்கு வருகிறவர்கள் எடுத்து வர வேண்டும் என்பதுதான் முறை. ஆனால், அதை யாரும் பின்பற்றுவது கிடையாது.
''கேஸ் சேஃப்ட்டி டிவைஸ் எப்படி செயல்படுகிறது?''
''இதுவும் ரெகுலேட்டர்தான். இது, மூன்று விதமான பயன்களை அளிக்கிறது... சேஃப்டி, சேவிங்க்ஸ், மீட்டர்.
சேஃப்டி - இதிலிருந்து அவுட்புட் மட்டும் வரும்; இன்புட் எதுவும் எடுத்துக்கொள்ளாது. எனவே, டியூப் தீப்பிடித்தாலும் கேஸ் சிலிண்டர் வெடிக்காது. இதில் பொருத்தப்பட்டிருக்கும் சென்சார் மூலமாக கேஸ் லீக் ஆவதை அது தானாக உணர்ந்து, சிலிண்டரிலிருந்து அடுப்புக்கு கேஸ் செல்வதைத் தடுத்துவிடுவதால் விபத்துகள் தவிர்க்கப்படுகின்றன.
சேவிங்க்ஸ் - பொதுவாக சிலிண்டரிலிருந்து 320 பிஎஸ்ஐ பிரஷரில் அடுப்புக்கு கேஸ் வரும். சேஃப்டி டிவைஸ், இதைப் பாதியாகக் குறைத்துதான் அடுப்புக்கு அனுப்பும். இதனால், கேஸின் பயன்பாடு வழக்கமானதைவிட இன்னும் சில நாட்களுக்கு நீடிக்கும்.
மீட்டர் - இதிலுள்ள மீட்டர் மூலமாக கேஸ் எவ்வளவு தீர்ந்திருக்கிறது என்பதை துல்லியமாகக் கணக்கிட்டு, எப்போது கேஸ் தீரும் என்பதையும் கண்டறியலாம்.
இந்த 'கேஸ் சேஃப்டி டிவைஸ்' கன் மெட்டலில் செய்யப்பட்டிருப்பதால் 30 ஆண்டுகள் வரை நீடித்து உழைக்கும்.  மேலும், NRV டெக்னாலஜி பயன்படுத்தப்பட்டிருப்பதால் சிலிண்டர் வெடிக்க வாய்ப்பில்லை. இது சுமார் 2,500 ரூபாய் விலையில் கிடைக்கும்.

http://pettagum.blogspot.in/2015/08/blog-post_23.html

--

இது என் இறைவனின் அருட்கொடையிளிருந்து அருளப்பட்டதுwww.sahabudeen.com

ஒவ்வாமை என்கிற அலர்ஜி

சி.எஸ். தேவநாதன்
அலர்ஜி எனப்படும் ஒவ்வாமை ஒரு நோயோ இல்லையோ, பல நோய்களுக்கு அதுவே காரணமாகி விடுகிறது.
நீங்கள் பார்த்திருப்பீர்கள். ஒரு நாளுக்குள் குறைந்தது நூறு தும்மல் போடுகிறவரை. கண்ணில் இருந்து நீர் ஒழுகும். மண்டை ஒரேடியாய்க் கனத்துப் போகும். அவருடைய பிரச்சனை என்ன? பூவின் மகரந்தத் தூள்கள் காற்றில் பறந்து வந்து மூச்சு வழியாய் உள்ளே போய்விட்டிருக்கும். ஒவ்வொரு மழைக் காலமும் அவருக்கு நரக வேதனைதான்.
சிலருக்கு ஆண்டு முழுதும் பிரச்சனை. மகரந்தத் தூள் மாதிரி ஒரு சிறிய பூச்சியின் ஒரு சிறிய துகள் உணவு மருந்து ரசாயனப் பொருள் இறால் மீனின் ருசி சாதாரணத் தூசு என்று பல உருவங்களில் அலர்ஜி அவர்களைத் தாக்கி விட்டிருக்கும். மூச்சுத் திணறல் மனிதரை உலுக்கி எடுத்துவிடும்.
பெற்றோரில் ஒருவருக்கு அலர்ஜி இருந்தால் அவரது குழந்தைகளில் ஒருவருக்கு அலர்ஜி வர வாய்ப்பிருக்கிறது. பெற்றோர் இருவருக்கும் அலர்ஜி இருந்தால் ஒன்றுக்கு மேற்பட்ட பிள்ளைகளுக்கு அலர்ஜி வரும்.
அலர்ஜி என்பது என்ன?
உடலுக்கு ஒத்துப் போகும் சில பொருட்கள் தீடீரென்று ஒத்துப் போகாமல் போவது அலர்ஜி. தேவையில்லாத நேரத்தில் நோய் எதிர்ப்பு சக்தி வேலை செய்வதால் அலர்ஜி உண்டாகிறது.
மூக்கு அலர்ஜி – ஓயாத தும்மல்.
நுரையீரல் அலர்ஜி – ஆஸ்துமா இவற்றுடன் உணவுப் பொருட்களில் (பால் மீன் முட்டை கோதுமை) அலர்ஜி, மருந்துகளில் (ஊசி, மாத்திரை) அலர்ஜி, கண் காது அலர்ஜி என பல வகைகள்.
சிலருக்கு காற்றிலும் அலர்ஜி.
காரணிகள் : தூசுப் பூச்சி : இதுவே அலர்ஜிக்கு பிரதான காரணம். தூசுவில் வாழும் இந்த உயிரி காற்றில் கலந்து நம் வீடுகளைத் தாக்கும். மிகவும் ஆபத்தானது.
பூச்சிகள் : பூச்சிகளின் உடல் உறுப்புகளும், கழிவுகளும் காற்றில் மிதந்து நம் மூச்சுக்குள் போகும்.
பூஞ்சை காளான் : பயிர், புல், உணவு, தோல் பொருட்கள், ஃபர்னிச்சரில் உள்ளன.
உமி : காற்றில் அடித்து வரப்படும் உமி பலவித அலர்ஜியை ஏற்படுத்தும். தும்மல், ஜலதோஷம் சமயத்தில் பிரச்சனை தீவிரமாக இருக்கும்.
உணவு : அரிசி, பருப்புகள், மீன், தேங்காய், சோயா.
அறிகுறிகள்
தலைவலி மூக்கில் இருந்து நீர் ஒழுகல் வாந்தி மயக்கம்
சிலருக்கு உடல் சில்லிட்டுப் போகும்.
தூக்கமின்மை
படுக்கையில் சிறுநீர் கழித்தல்
தலைவலி
நெஞ்சு வலி
படபடப்பு
எப்போதும் பரபரப்புடன் காணப்படுதல்
பிறப்புறுப்புகளில் நமைச்சல்
சிகிச்சை
முதலில் அலர்ஜிக்கான மூல காரணம் எது எது என்று இனம் காண வேண்டும். அடுத்து எது காரணமானதோ அதைத் தவிர்க்க வேண்டும். மூன்றாவதாக உடல் நலத்தை எதிர்ப்புச் சக்தியை மேம்படுத்திக் கொள்வது.
ஐயத்துக்குரிய உணவுப் பொருட்களை இரண்டு வாரத்துக்கு ஒதுக்கி விடுவதன் மூலம் காரணத்தைக் கண்டுபிடிக்க முடியும்.
நாடித்துடிப்பு சோதனையும் உதவும். உண்பதற்கு முன் நாடித் துடிப்பைச் சோதிக்க வேண்டும். சாப்பாட்டில் ஒரு உணவு மட்டுமே இடம் பெறச் செய்யவும். உண்ட பிறகு அரை மணி நேரம் கழித்து மீண்டும் நாடித்துடிப்பைச் சோதிக்கவும். ஓரளவு எகிறியிருந்தால் அது இயல்பு என்று இருந்துவிடலாம். 16 கூடுதல் துடிப்புகள் வரை இயல்பு தான். நாடித்துடிப்புகள் 84-ஐக் கடந்து விட்டிருப்பின் உண்டு கழிந்து ஒரு மணி நேரமும் அதே அளவு இருப்பின் உங்களுக்கு ஒவ்வாமை இருக்கிறதென்று தீர்மானிக்கலாம்.
அலர்ஜியைத் தடுக்கவும், முறியடிக்கவும் சிறந்த வழி, எதிர்ப்புச் சக்தியை வளர்த்துக் கொள்வதுதான். அப்போது எந்தக் காரணி பற்றியும் கவலைப்பட வேண்டியிராது.
சிகிச்சையின் தொடக்கத்தில் நான்கைந்து நாட்கள் பழச்சாறு மட்டுமே பருகி உபசாவம் இருக்க வேண்டும். அதன் பிறகு ஒற்றை உணவு கொள்ளலாம். ஏதாவது ஒரு பழம் அல்லது காய்கறி, கேரட், திராட்சை, ஆப்பிள். இது ஒரு வாரத்துக்குத் தொடரப்பட வேண்டிய திட்டம். பிறகு, இன்னொரு அயிட்டத்தைச் சேர்க்க வேண்டும். நான்கு வாரங்களுக்குப் பிறகு புரத உணவை அறிமுகப்படுத்தலாம். புதிதாய்ச் சேர்த்த உணவு ஒவ்வாமையை ஏற்படுத்தியதாய் தெரிந்தால் அதை நிறுத்தி விட்டு, புதிய உணவு ஒன்றை முயற்சிக்கலாம். இப்படியாக அலர்ஜி ஏற்படுத்தும் எல்லா பொருட்களையும் உணவில் இருந்து அகற்றி விடலாம்.
உடம்பில் காரப் பொருள் சேமிப்பில் இருக்க வேண்டும். தவறான உணவுகள் களைப்பு, மன அழுத்தம், உறக்கமின்மை காரணமாய் ஏற்படும் அமில நெருக்கடியை அது சமாளிக்கும்.
உணவில் தவிர்க்கப்பட வேண்டியவை காபி, டீ, சாக்லெட், கோலா பானங்கள், மது, சர்க்கரை, இனிப்புகள், இறைச்சி, மீன், கோழி, பால், புகையூட்டியவை, உப்புள்ளவை, ஊறுகாய்கள், நிறமூட்டிய, சுவையூட்டிய உணவு, புகையிலையை எந்த வடிவிலும் பயன்படுத்தக் கூடாது. இவை நச்சுப் பொருட்கள் சேரவோ, அட்ரினல் சுரப்பு தூண்டப்படவோ காரணமாகிவிடுகின்றன. அல்லது கணைய நீர் உற்பத்தியில் சிரமத்தை ஏற்படுத்தி விடும். இரத்த சர்க்கரை அளவு சீர்கெடவும் நேரும்.
வைட்டமின் சி உடம்புக்கு தேவையான எதிர்ப்புச் சக்தியை வழங்கும். பி5 அலர்ஜியில் அவதிப்படுகிறவர்களுக்கு நிவாரணமளிக்கும். அலர்ஜிக்கு எதிரான தன்மைகள் கொண்ட வைட்டமின் இ சத்தையும் போதிய அளவு உட்கொள்ளலாம்.
ஆமணக்கு எண்ணெயில் ஐந்து சொட்டுகள் எடுத்து சிறிதளவு பழச்சாறு அல்லது தண்ணீர் கலந்து காலையில் வெறும் வயிற்றில் பருகுவது சிறந்த பலனை அளிக்கும்.
மன உளைச்சல் காரணமாக அலர்ஜி ஏற்பட்டிருப்பின் இளைப்பாறுதல், உடற்பயிற்சி, தியானம், மனக் கட்டுப்பாடு உதவும்.
யோகாசனங்களில் யோகமுத்திரை, அர்த்தமத்ஸ்யேந்திராசனா, சர்வாங்காசனா, சவாசனா, ப்ராணயாமம் பலனளிக்கும்.
கவனத்திற்கு
ஒருவருக்கு இன்ன பொருள்தான் என்றில்லாமல் எந்தப் பொருள் வேண்டுமானாலும் ஒவ்வாமையை ஏற்படுத்தலாம். ஒருவர் தனக்கு ஒவ்வாமை ஏற்படுத்தும் பொருளைக் கண்டிப்பாக தவிர்க்க வேண்டும். அந்த முன்னெச்சரிக்கை நடவடிக்கை அவருக்கு அலர்ஜி, ஆஸ்துமா, இழுப்பு வராமல் தடுத்து உதவும்.
குடும்பத்தில் ஏற்கனவே ஒருவர் அலர்ஜியில் பாதிக்கப்பட்டிருந்தால், அந்தக் குடும்பத்தின் மற்ற உறுப்பினர்கள் அலர்ஜி பற்றி மிகவும் எச்சரிக்கையாக இருப்பது நல்லது. ஆனால் ஒருவருக்கு ஒவ்வாதது இன்னொருவருக்கும் ஒவ்வாமல் போய்விடும் என்பதில்லை. எனவே அவர்கள் வீண் கவலைக்குள்ளாக வேண்டாம்.
குழந்தைகளுக்கு பஞ்சடைத்த பொம்மைகளை விளையாடக் கொடுக்கக் கூடாது கூடிய வரை ஐஸ்கிரீம், சாக்லெட் உண்ண அனுமதிக்கக் கூடாது. வீட்டில் உள்ள நாய், பூனை, முயல் போன்ற செல்லப் பிராணிகளுடன் விளையாடுவதை அறவே தவிர்க்க வேண்டும்.
படுக்கை அறை சுத்தமாக, நிரம்ப சாமான்கள் இல்லாததாய் இருக்க வேண்டும்.
எண்ணெயில் பொரித்த மசாலா உணவுகள் கூடாது. வயிறு முட்டச் சாப்பிடுவது தவறு. இரவு உணவை எளிமையாக, நேரத்தோடு முடித்துக் கொள்ள வெண்டும். பலமான விருந்துகளில் கட்டுப்பாடாக உண்ண வேண்டும். இரவில் பால் சாப்பிடுவதைத் தவிர்த்து விடலாம்.
யோகாசனம், தியானம், மன அடக்கம், மூச்சுப் பயிற்சிகள் மூலம் உதரவிதானத்துக்கு வேலை கொடுத்து மார்புத் தசைகளுக்கு ஓய்வளிக்கலாம்.
மேற்கண்டவைகளைக் கவனமாகக் கடைப்பிடித்தால், அதுவே ஒவ்வாமையில் தடுப்பு நடவடிக்கைகளாய் அமையும்.
( நர்கிஸ் – ஆகஸ்ட் 2015 )
from: Muduvai Hidayath <muduvaihidayath@gmail.com>

--

இது என் இறைவனின் அருட்கொடையிளிருந்து அருளப்பட்டதுwww.sahabudeen.com

முஸ்லிம்களின் ஜனாஸாக்களை பிரேதப் பரிசோதனை செய்யலாமா?

மௌலவி M.S.M. இம்தியாஸ் ஸலஃபி  

-இம்தியாஸ் யூசுப் ஸலபி-
ஒருவர் திடீரென மரணித்து விட்டால் நீரில் மூழ்கி மரணித்து விட்டால் கீழே விழுந்து, விபத்தில் சிக்கி, வெட்டப்பட்டு, சுடப்பட்டு மரணித்து விட்டால் அல்லது இது போன்ற ஏதோ ஒரு விபத்தில் மரணித்தால் அந்த மரணம் சம்பந்தமாக உண்மையான நிலையை கண்டறிவதற்காக அந்த மையத்தின் உடலை அறுத்து பிரிசோதனை செய்யப்படுகிறது. இதனையே "போஸ்ட்மாட்டம்" (postmortem) பிரேதப் பரிசோதனை என கூறுவோம்.
எவருடைய மரணத்தில் சந்தேகம் எழுகின்றதோ அல்லது கொலை செய்யப்பட்டதாக சொல்லப்படுகின்றதோ அந்த மரணத்தின் உண்மைத்தன்மையை கண்டுப்பிடிக்கவும் குற்றவாளியை கைது செய்யவும் போஸ்மாட்டம் செய்யப்படுகின்றது. இதன் நோக்கம் சடலத்தை சல்லடை போடுவதல்ல மாறாக குற்றவாளியை சட்டத்திற்கு முன் நிறுத்துவதாகும்.
யாருடைய மரணமாக இருந்தாலும் ஜாதி பேதமின்றி அரசாங்கம் இதைசெய்துதான் ஆகும். ஆனாலும், முஸ்லிம்களில் பெரும்பாலானோர் இதை விரும்புவதில்லை.
இதற்கு இவர்கள் காட்டும் ஆதாரம் என்ன வெனில் "யுத்தம் நடை பெறும் நேரங்களில் இறந்துவிட்ட எதிரிகளின் உடல்களை சிதைப்பதை நபி (ஸல்) அவர்கள் தடை செய்துள்ளார்கள்" இதனடிப்படையில் தற்போது நடை முறையிலுள்ள பிரேதப் பரிசோனையை கூடாது என வாதிடுகின்றனர். இந்த வாதம்; தவறானதாகும்.
யுத்தம் முடிவடைந்த பின் எதிரிகள் மீதுள்ள கோபத்தின் காரணமாக பழி தீர்ப்பதற்கு இறந்துபோன உடல் உறுப்புக்களை துண்டு துண்டாக வெட்டுவது மற்றும் சிதைப்பது அன்றைய நடைமுறையில் இருந்தது. இது மனிதாபிமானமற்ற செயல். முஸ்லிம்கள் ஒருபோதும் இதை செய்யக் கூடாது என நபியவர்கள் கண்டிப்பாக உத்தரவிட்டார்கள்.
யுத்தமாக இருந்தாலும் யுத்தமல்லாத ஏனைய நேரங்களாக இருந்தாலும் ஒருவரது உடல் உறுப்புக்களை சிதைப்பதை இஸ்லாம் அனுமதிக்கவில்லை. என்றாலும் இன்றைய காலச்சூழலில் பிரேதப் பரிசோதனை என்பது இறந்தவரின் உடல் உறுப்புக்களை வீணாக அறுத்து வெட்டி வீசுவதல்ல. இறந்தவரின் மீதுள்ள கோபத்தின் காரணமாக கீறிகிழிப்பதுமல்ல.
இது கொலையா? அல்லது மரணமா? என்பதை ஆராய்ந்து குற்றத்தை நிரூபித்து குற்றவாளியை நீதிக்கு முன் நிறுத்துவதற்காக செய்யப்படுகின்ற மருத்துவப் பரிசோதனையாகும். இந்த மருத்துவப் பரிசோதனைக்காக குறிப்பிட்ட உறுப்புக்கள் வெட்டி பரிசோதிக்கப்படுகிறதே தவிர மொத்த உடல் உறுப்புக்களும் யுத்தங்களில் எதிரிகள் செய்வதுபோல் வெட்டி சிதைக்கப்படுவதில்லை. எனவே, இவ்விரண்டிற்குமுள்ள வேறுபாட்டை நன்றாகப் புரிந்துகொண்டால் பிரேதப் பரிசோதனையின் உண்மையையும் அதன் அவசியத்தையும் புரிந்து கொள்வார்கள்.
இன்னும் சில முஸ்லிம்கள், இந்த பிரேதப் பரிசோதனை மையத்திற்கு செய்கின்ற வேதனையாக இருக்கும் என்றும் கூறி தவிர்த்து விடுகிறார்கள். அல்லது மையத்தை மருத்துவ சோதனைக்கு உட்படுத்தவிடாமல் தடுப்பதற்கு சில வழிமுறைகளையும் கையாளுகின்றார்கள். இது இவர்கள் செய்கின்ற பெரும் தவறாகும்.
இதன் காரணமாக குறித்த அந்த மரணத்திற்கான உண்மையான காரணத்தை கண்டறிய முடியாமல் போவதுடன் குற்றவாளியையும் தண்டனையிலிருந்து காப்பாற்றி விடுகின்ற ஒரு காரியமாகவும் அமைந்து விடுகிறது.
பிரேதப் பரிசோதனையை தவிர்ப்பதன் மூலமாக நாளடைவில் மொத்த சமுதாயத்தையும் பாதிப்படையச் செய்யக் கூடிய நடவடிக்கையாகக் கூட அது மாறிவிடும். அது மட்டுமன்றி குற்றவாளிக்கு சட்ட அங்கீகாரத்தை நாங்களாகவே ஏற்படுத்திக் கொடுத்தது போல் ஆகிவிடும்.
முஸ்லிம்கள் பிரேதப் பரிசோதனையை விரும்ப மாட்டார்கள் என்று எதிரிகள் தெரிந்து கொண்டால் திட்டமிட்ட முறையில் முஸ்லிம்கள் கொலை செய்யப்படுவதற்கு காரணமாக அமைந்துவிடும். எதிரிகள் என்று குறிப்பிடும்போது சமூக எதிரிகளாகவும் இருக்கலாம். நண்பர்களுக்கிடையே உருவாகும் எதிரிகளாகவும் இருக்கலாம். எனவே, இது ஒரு தனிப்பட்ட பிரச்சினையல்ல. சமூகப் பிரச்சினை என்பதையும் கவனத்தில் கொள்ள வேண்டும்.
ஒருவர் உயிருடன் இருக்கும்போது அவரது உடலில் ஏற்பட்ட நோய் அல்லது காயம் காரணமாக சிலநேரம் அறுவை சிகிச்சை செய்ய வேண்டிய நிலை உருவாகிறது. அப்போது அவரது உடல் உறுப்புக்களை அறுத்து பரிசோதனை செய்து மருத்துவம் செய்யப்படுகிறது. இறைவன் நாடினால் உயிர் பிழைப்பார் அல்லது மரணித்து விடுவார்.
இயற்கையாகப் பிள்ளையை பெற்றெடுக்க முடியாதபோது அறுவை சிகிச்சை (ஸீஸரின்) முறையில் குழந்தையை வெளியில் எடுக்கிறார்கள்.
இருதயம் ஒழுங்காக செயல்படவில்லையானால் அதனை ஒழுங்குபடுத்துவதற்காக இருதய அறுவை சிகிச்சை செய்யகிறார்கள்.
கிட்னி பழுதடைந்தால் அதனை அகற்றிவிட்டு வேறொரு கிட்னியை அறுவை சிகிச்சை மூலம் பொறுத்திக் கொள்கிறார்கள்.
இப்படி நூற்றுக் கணக்கான அறுவை சிகிச்சைகள் மனிதனின் நலன் கருதி செய்யப்படுகின்றன.
நிர்ப்பந்தம் கருதிதான் இந்த அறுவை சிகிச்சைகள் செய்யப்படுகிறன. அப்படி செய்யும் போது உயிருள்ள மனிதனின் உடல் உறுப்புக்களை சிதைக்கிறார்கள் என்று யாரும் சொல்வதில்லை. பொலிஸில் முறைப்பாடு செய்வதில்லை. இது அவசியமான ஒன்று என்று எப்படி புரிந்து கொள்கிறார்களோ அதுபோல பிரேதப் பரிசோதனையம் அவசியமான ஒன்று என்று புரிந்து கொள்ள வேண்டும்.
மூஸா நபியின் சமூகத்தில் ஒருவர் கொலை செய்யப்பட்டு விடுகிறார். கொலையாளி யார் என்று தெரியவில்லை. அல்லாஹ்வின் கட்டளைப் பிரகாரம் ஒருமாடு அறுக்கப்பட்டு அதன் பாகத்தினால் கொலையாளியின் மீது அடிக்கப்பட்டது. கொலையுண்டவர் உயிர் பெற்றெழுந்து தன்னை கொன்றவர் இன்னார் தான் என அடையாளம் காட்டி விட்டு மரணிக்கிறார். இச்செய்தியை குர்ஆன் மிகத் தெளிவாக விபரிக்கிறது. (பார்க்க:2:72.73.)
ஆயிரம் நிரபராதிகள் தப்பினாலும் ஒரு குற்றவாளி தப்பிவிடக் கூடாது என்பது போல் கொலையாளி தப்பிவிடக் கூடாது என்ற விடயத்தில் இஸ்லாம் காட்டும் ஆர்வத்தை இங்கே கவனத்தில் கொள்ள வேண்டும். பிரேத பரிசோதனை மூலம் குற்றம் நிரூபிக்கப்படுகிறது உண்மைத்தன்மை நிலை நாட்டப்படுகின்றது என்பது தான் சுருக்கமான செய்தி.
எனவே நிர்ப்பந்தம் காரணமாக செய்யப்படும் எந்தக் காரியத்தையும் இஸ்லாம் தடுக்கவில்லை. ஆகவே பிரேதப் பரிசோதனையும் நிர்ப்பந்தம் காரணமாகத் தான் செய்யப்படுகின்றது. அது கூடாது என்ற சொல்வது தவறான வாதமாகும்.
இதனுடன் தொடரப்பான இன்னுமொரு சந்தேகத்தை நிவர்த்தி செய்வது பொருத்தமென கருதுகின்றேன். அதாவது பிரேதப் பரிசோதனைக்கு உட்படுத்தப்பட்ட மையத்தை குளிப்பாட்டுவதா இல்லையா என்ற சந்தேகமும் பலரிடம் உண்டு.
மையத்தை குளிப்பாட்டுவது அதனது அசுத்தங்களை நீக்கி சுத்தப்படுத்துவதற்காகத்தான். ஆனால், பிரேதப் பரிசோதனைக்கு உட்பட்ட மையத்தை குளிப்பாட்டும்போது மேலும் அசுத்தங்கள் ஏற்படுவதற்கோ, இரத்தங்கள் வடிந்து ஓடுவதற்கோ இடம்பாடுண்டு. அதன் காரணமாக கபன் ஆடை கூட அசுத்தமாகி விடலாம். எனவே குளிப்பாட்டுவதற்கு பொருத்தமானதாக இல்லை எனக் கண்டால் குளிப்பாட்டுவதற்கு பதிலாக தயம்மும் செய்துவிடுவதே சிறந்த செயலாக இருக்கும்.
உயிரோடு இருக்கும்போது குளிக்க முடியாத அளவுக்கு காயம் அல்லது வேறு காரணங்கள் இருந்தால் குளிப்புக்கு பகரமாக தயம்மும் செய்யுமாறு மார்க்கம் வலியுறுத்துகிறது. அதுபோல் இறந்த உடலும் (மையத்தும்) குளிப்பாட்ட முடியாத நிலையில் இருந்தால் தயம்மும் செய்து விடுவதே சிறந்த வழிமுறையாகும்.
இதுபோல் விபத்தில் இறந்தவர்கள், உடல் சிதைந்து இறந்தவர்கள் தீயில் கருகி இறந்தவர்கள், ஆகியோர்களது உடல்கள் பிடிக்க முடியாத அளவுக்கு நசுங்கிப் போயிருக்கும்;. அப்போது குளிப்பாட்டாமலோ தயம்மும் செய்யாமலோ விட்டுவிட வேண்டியிருக்கும். சிலநேரம் அப்படியான மையத்துக்களை அரசாங்கம் சீல் குத்தி| தரும். அந்த மையத்தை யாரும் தொட்டுப்பார்க்க அனுமதிக்கப்பட மாட்டார்கள். இது மாதிரியான சூழ்நிலையில் குளிப்பாட்டாமலும் தயம்மும் செய்யாமலும் விடுவதால் குற்றமாகாது.
உங்களுக்கு நான் ஒரு கட்டளையிட்டிருந்தால் அதனை உங்களால் முடிந்தவரைச் செய்யுங்கள் என நபி (ஸல்) அவர்கள் கூறியுள்ளார்கள். நூல்: புகாரி
நபி (ஸல்) அவர்களின் இக்கூற்றுக் கேற்ப நம்மால் முடியாத காரியத்தில் இவ்வாறு செய்வதால் அல்லாஹ் குற்றம் பிடிக்கமாட்டான்

http://www.islamkalvi.com/?p=104859

--

இது என் இறைவனின் அருட்கொடையிளிருந்து அருளப்பட்டதுwww.sahabudeen.com

சுன்னத்தான தொழுகைகள் – 02

மௌலவி S.H.M. இஸ்மாயில் ஸலஃபி  

– S.H.M. இஸ்மாயில் ஸலஃபி – ஆசிரியர், உண்மை உதயம் மாதஇதழ்
சுன்னத்தான தொழுகைகள் தொடரில் சுபஹுடைய முன் சுன்னத்து தொழுவது குறித்து நாம் பார்த்து வருகின்றோம்.
தொழுத பின்னர் வலப்பக்கமாக சிறிது சாய்ந்து படுத்துக் கொள்ளுதல்:
'பஜ்ருடைய அதானுக்கும் தொழுகைக்கும் இடையே நபி(ச) அவர்கள் சுருக்கமான இரண்டு ரக்அத்துக்கள் தொழுவார்கள். இகாமத் சொல்வதற்காக முஅத்தின் அவர்களிடம் வரும் வரை வலப்புறம் சாய்ந்து படுத்துக்கொள்வார்கள்.'
அறிவிப்பவர்: ஆயிஷா(ரழி)
ஆதாரம்: புஹாரி- 626, 1160
'நபி(ச) அவர்கள் சுபஹுடைய (சுன்னத்து) இரண்டு ரக்அத்துகள் தொழுவார்கள். நான் விழித்திருந்தால் என்னோடு கதைத்துக் கொண்டிருப்பார்கள். இல்லையென்றால் (வலப்புறம்) சாய்ந்து படுத்துக் கொள்வார்கள்.'
அறிவிப்பவர்: ஆயிஷா(ரழி)
ஆதாரம்: புஹாரி 1168
(இந்த ஹதீஸ்களை வைத்து முடிவெடுப்பதில் அறிஞர்கள் முரண்பட்ட பல நிலைப்பாட்டை எடுக்கின்றனர்.)
சுன்னத்து:
மேற்படி ஹதீஸ்களின்படி சுபஹுடைய சுன்னத்துக்குப் பின்னர் வலப்புறம் சாய்ந்து தொழுகை நேரம் வரும் வரை படுத்துக் கொள்வது சுன்னத்து என பல அறிஞர்கள் கூறியுள்ளனர். அனஸ்(வ), அபூ ஹுரைரா(வ), அபூமூஸா அல் அஷ;அரி(வ) போன்ற நபித்தோழர்கள் இந்தக் கருத்தில் உள்ளனர்.
வாஜிப்:
இமாம் இப்னு ஹஸ்ம்(ரஹ்) அவர்கள் இவ்வாறு சிறிது படுப்பதை வாஜிப் – கட்டாயம் என்று கூறுகின்றார். இந்தக் கருத்து ஏற்றுக் கொள்ளத்தக்கதாக இல்லை என்பதே இமாம் இப்னு தைமிய்யா(ரஹ்) போன்றோரின் கருத்தாகும்.
மக்ரூஹ்:
சுபஹுடைய சுன்னத்தின் பின் (பள்ளியில்) படுத்துக் கொள்வது மக்ரூஹ் – வெறுக்கத்தக்கது என்பது இவர்களின் கருத்தாகும். இவர்களில் இப்னு மஸ்ஊத்(வ), இப்னுல் முஸையப், நகயி, காழி இயாழ்(ரஹ்) போன்றோர் குறிப்பிடத்தக்கவர்களாவர். நபி(ச) அவர்கள் சுபஹுடைய சுன்னத்தின் பின் பள்ளியில் படுத்துக் கொண்டதாக அறியப்படவில்லை. அவ்வாறு நபி(ச) அவர்கள் படுத்திருந்தால் பல வழிகளிலும் அது அறிவிக்கப்பட்டிருக்கும் என்பது இத்தரப்பாரின் வாதமாகும்.
இவற்றைத் தொகுத்து நோக்கும் போது பின்வரும் முடிவை எடுக்கலாம்.
சுபஹுடைய சுன்னத்தின் பின் வலப்புறமாக சாய்ந்து படுத்துக் கொள்வது பின்வரும் நிபந்தனைகளுக்கு உட்பட்ட சுன்னா என்று கூறலாம்.
நபியவர்கள் வீட்டில் சிறிது படுத்ததாகவே வந்துள்ளது. மஸ்ஜிதில் படுத்ததாக வரவில்லை. இந்த அடிப்படையில் வீட்டில் இதை அமுல்படுத்தலாம்.
இந்த சுன்னாவைச் செய்பவர் அப்படியே தூங்கிவிடாமல் சுபஹ் தொழுகைக்கு எழக்கூடியவராக இருக்க வேண்டும். தன்னையும் மீறி தூங்கிவிடுவார் என்றிருந்தால் அவர் இதை நடைமுறைப் படுத்தலாகாது. அத்துடன், நபி(ச) அவர்கள் உறக்க விடயத்தில் எம்மை விட வித்தியாசமானவர்கள். அவர்களின் கண்கள் உறங்கினாலும் உள்ளம் உறங்காது என்பதையும் உறக்கம் அவர்களின் வுழூவை முறிக்காது என்பதையும் நபியவர்களின் வீடும், பள்ளியும் அருகருகே இருந்தன என்பதையும் கவனத்திற் கொள்ள வேண்டும்.
சுபஹுடைய சுன்னத்தைக் 'கழா' செய்வது:
தவிர்க்க முடியாத காரணத்தால் ஒரு தொழுகையைத் தொழ முடியாத சூழ்நிலை ஏற்படும் போது அந்தத் தொழுகையை அதற்குரிய நேரம் தாண்டி வேறு நேரத்தில் தொழுவதையே 'கழா' செய்தல் என்பார்கள். நபியவர்கள் இவ்வாறு தவறிப் போன சுன்னத்தான தொழுகைகளைக் கழா செய்துள்ளார்கள். இந்த அடிப்படையில் சுபஹுடைய முன் சுன்னத்து தவறிவிட்டால் அதைக் கழாச் செய்து கொள்ள முடியும்.
'நபி(ச) அவர்கள் ஒரு பயணத்தில் இருந்தார்கள். சூரியன் உதித்த பின்னரே அவர்கள் விழித்தார்கள். உடனே அவர்கள் நபித்தோழர்களிடம் 'இது எங்களிடம் ஷைத்தான் வந்த இடம். உங்கள் கால்நடைகளின் தலைகளைப் பிடித்துக் கொண்டு இந்த இடத்திலிருந்து வெளியேறுங்கள் என்றார்கள். பின்னர் வுழூச் செய்து சுபஹுடைய சுன்னத் இரண்டு ரக்அத்துகள் தொழுதார்கள். பின்னர் இகாமத் கூறப்பட்டது அதன் பின் சுபஹைத் தொழுதார்கள்.' (ஹதீஸின் கருத்து..)
அறிவிப்பவர்: அபூஹுரைரா(வ)
ஆதாரம்: முஸ்லிம்- 680-310, நஸாஈ- 623, இப்னு குஸைமா- 988
ஒருவர் பள்ளிக்கு வருகிறார். சுபஹ் தொழுவிக்கப்பட்டுக் கொண்டிருக்கின்றது. அவர் ஜமாஅத்துடன் சேர்ந்து சுபஹைத் தொழுதுவிட்டு பின்னர் சுபஹுடைய முன் சுன்னத்தைத் தொழலாம். இதற்கு நபி(ச) அவர்கள் அனுமதியளித்துள்ளார்கள். சுபஹுடைய சுன்னத்தைத் தொழாதவர் சுபஹ் தொழுகைக்குப் பின்னர் சுபஹின் சுன்னத்தைத் தொழுவது அனுமதிக்கப்பட்டுள்ளது. இவ்வாறு இல்லாது சுபஹுக்குப் பின்னர் சுன்னத் தொழுவது தடுக்கப்பட்டதாகும். சுபஹுக்குப் பின்னர் சூரியன் உதித்து சற்று உயரும் வரை உள்ள நேரம் தொழுவது தடுக்கப்பட்ட நேரங்களில் ஒன்றாகும் என்பதை நாம் ஏற்கனவே குறிப்பிட்டுள்ளோம்.
லுஹருடைய சுன்னத்து:
லுஹருடைய சுன்னத் பின்வரும் மூன்று அடிப்படைகளில் அமையலாம்.
1. முன்னர் இரண்டு ரக்அத்துகள், பின்னர் இரண்டு ரக்அத்துகள்.
'இப்னு உமர்(வ) அறிவித்தார். நபி(ச) அவர்கள் லுஹருக்கு முன் இரண்டு ரக்அத்கள் லுஹருக்குப் பின் இரண்டு ரக்அத்கள் மஃரிபிற்குப் பின் வீட்டில் இரண்டு ரக்அத்கள் இஷாவிற்குப் பின் வீட்டில் இரண்டு ரக்அத்கள் சுபஹுக்கு முன் இரண்டு ரக்அத்கள் ஆகிய பத்து ரக்அத்களைத் தொழுததை நான் நினைவில் வைத்திருக்கிறேன். சுபஹுக்கு முன் உள்ள அந்த நேரம் நபி(ச) அவர்களிடம் யாரும் செல்ல முடியாத நேரமாகும்.'
(புஹாரி: 1180)
2. முன்னர் நான்கு ரக்அத்துகள், பின்னர் இரண்டு ரக்அத்துகள்.
'ஆயிஷா(ரழி) அறிவித்தார். நபி(ச) அவர்கள் லுஹருக்கு முன் நான்கு ரக்அத்களையும் சுபஹுக்கு முன் இரண்டு ரக்அத்களையும் விட்டதில்லை.'
(புஹாரி: 1182)
'நபி(ச) அவர்கள் லுஹருக்கு முன்னர் எனது வீட்டில் நான்கு ரக்அத்துக்கள் தொழுவார்கள். பின்னர் வெளியிறங்கி மக்களுக்குத் தொழுவிப்பார்கள். பின்னர் (வீட்டில் வந்து) இரண்டு ரக்அத்துக்கள் தொழுவார்கள்……'
அறிவிப்பவர்: ஆயிஷா(ரழி)
ஆதாரம்: முஸ்லிம்-730-105, அபூதாவூத்-1251, திர்மிதி-424, நஸாஈ-874)
03. லுஹருக்கு முன்னர் நான்கு, பின்னர் நான்கு ரக்அத்துக்கள்.
'யார் லுஹருக்கு முன்னர் நான்கு ரக்அத்துக்கள், பின்னர் நான்கு ரக்அத்துக் கள் தொழுகின்றாரோ அவரை நரகத்திற்கு அல்லாஹ் ஹராமாக்கிவிடுவான்' என நபி(ச) அவர்கள் கூறுபவர்களாக இருந்தார்கள்.
அறிவிப்பவர்: உம்மு ஹபீபா(ரழி)
ஆதாரம்: நஸாஈ- 1814
(அல்பானி (ரஹ்) அவர்கள் இதை ஸஹீஹ் என்று குறிப்பிடுகின்றார்கள்.)
இந்த மூன்று அடிப்படைகளிலும் லுஹருடைய சுன்னத்தைத் தொழுது கொள்ளலாம்.
லுஹருடைய சுன்னத்தைக் கழா செய்தல்:
ஏதேனும் காரணத்தால் லுஹருடைய முன் சுன்னத்தைத் தொழ முடியாமல் போனால் லுஹர் தொழுத பின்னர் அதைத் தொழுது கொள்ளலாம்.
'நபி(ச) அவர்கள் லுஹருக்கு முன்னர் நான்கு ரக்அத்துக்கள் தொழாவிட்டால் அவற்றை லுஹருக்குப் பின்னர் தொழுவார்கள்.'
அறிவிப்பவர்: ஆயிஷா(ரழி)
ஆதாரம்: திர்மிதி 426
(அறிஞர் அல்பானி இதனை ஹஸன் தரத்தில் உள்ளது என்று குறிப்பிட்டுள்ளார்.)
இவ்வாறே ஏதேனும் காரணத்தால் லுஹருடைய பின் சுன்னத்தை தொழ முடியாது போனால் காரணம் நீங்கிய பின்னர் அதைத் தொழுது கொள்ளலாம்.
'குரைபு அறிவித்தார். அப்பாஸ்(வ), மிஸ்வர் இப்னு மக்ரமா(வ), அப்துர்ரஹ்மான் இப்னு அஸ்ஹர்(வ) ஆகியோர் என்னிடம் ஆயிஷா(ரழி) அவர்களிடம் சென்று எங்கள் அனைவரின் ஸலாமையும் அவருக்குக் கூறும்! அஸருக்குப் பின் இரண்டு ரக்அத் தொழுவது பற்றி அவரிடம் கேட்பீராக! நபி(ச) அவர்கள் அதை தடை செய்ததாக எங்களுக்குச் செய்தி கிடைத்திருக்க அத்தொழுகையை (ஆயிஷாவே!) நீங்கள் தொழுவதாகக் கேள்விப்படுகிறோம் என்று கேட்பீராக!' என்று கூறினார்கள். (மேலும்) இப்னு அப்பாஸ்(வ), தாமும் உமரும், இவ்வாறு (அஸருக்குப் பின்) தொழுபவர்களை அடிப்பவர்களாக இருந்ததையும் தெரிவிக்கச் சொன்னார்.
ஆயிஷா(ரழி) அவர்களிடம் சென்று, நான் அனுப்பப்பட்ட விஷயத்தைக் கூறினேன். அதற்கு ஆயிஷா(ரழி) 'நீர் உம்மு ஸலமா(ரழி) அவர்களிடம் கேளும்' எனக் கூறினார். நானும் இம்மூவரிடம் திரும்பி வந்து ஆயிஷா(ரழி) கூறியதைச் சொன்னேன். உம்மு ஸலமா(ரழி) அவர்களிடம் சென்று ஆயிஷா(ரழி) அவர்களிடம் கேட்ட கேள்வியைக் கேட்குமாறு மீண்டும் அனுப்பினார்கள். (உடனே நான் உம்மு ஸலமா(ரழி) அவர்களிடம் வந்து விஷயத்தைக் கூறியபோது) நபி(ச) அவர்கள் இவ்விரு ரக்அத்களைத் தடை செய்ததை கேட்டுள்ளேன். பிறகு அவர்கள் அஸர் தொழுதுவிட்டு இரண்டு ரக்அத்கள் தொழுததை பார்த்தேன். தொழுதுவிட்டு என்னுடைய வீட்டிற்கு வந்தார்கள். அப்போது என்னுடன் அன்ஸாரிகளில் பனூ ஹராம் எனும் கோத்திரத்தைச் சேர்ந்த பெண்கள் சிலர் இருந்தனர். அவர்களில் ஒரு பெண்ணை, தொழுது கொண்டிருக்கும் நபி(ச) அவர்களிடம் அனுப்பி, 'நீ அவர்களுக்கு அருகில் சென்று இறைத்தூதர் அவர்களே! நீங்கள் இந்த இரண்டு ரக்அத்கள் தொழுவதைத் தடுத்ததை கேட்டிருக்கிறேன். ஆனால், இப்போது தாங்களே அதைத் தொழுவதை நான் பார்க்கிறேனே! என நான் கேட்டதாக அவர்களிடம் நீ கூறு. அவர்கள் தம் கைகளினால் சைகை செய்தால் நீ பின்வாங்கிவிடு எனக் கூறி அனுப்பினேன். அப்பெண்ணும் கூறப்பட்டது போன்றே செய்தார். நபி(ச) அவர்கள் தம் கைகளால் சைகை செய்தபோது அப்பெண்மணி திரும்பி வந்துவிட்டார். தொழுகையை முடித்த நபி(ச) அவர்கள், 'அபூ உமய்யாவின் மகளே! அஸருக்குப் பின்னால் (தொழுத) இரண்டு ரக்அத்தைப் பற்றிக் கேட்டாய். அப்துல் கைஸ் கிளையைச் சேர்ந்தவர்கள் வந்ததால் லுஹருக்குப் பின்னாலுள்ள இரண்டு ரக்அத்கள் தொழ முடியவில்லை. அத்தொழுகையே இந்த இரண்டு ரக்அத்களாகும்' என்றார்கள் என உம்மு ஸலாமா(ரழி) விடையளித்தார்கள்.'
(புஹாரி: 1233)
இந்த ஹதீஸின் அடிப்படையில் லுஹருடைய பின் சுன்னத்தைத் தொழ முடியாது போய்விட்டால் அஸருக்குப் பின்னர் சரி அதைத் தொழுது கொள்ள முடியும் என்பதை அறியலாம்.
அஸரின் சுன்னத்து:
அஸர் தொழுகைக்கு என்று வலியுறுத்தப்பட்ட சுன்னத்து எதுவும் இல்லை. இருப்பினும் அதானுக்கும் இகாமத்திற்கும் இடையில் இரண்டு ரக்அத்துக்கள் சுன்னத்து உண்டு என புஹாரி, முஸ்லிமில் பதிவாகியிருக்கும் பொதுவான ஹதீஸின் அடிப்படையில் அஸருக்கு முன்னர் இரண்டு ரக்அத்துக்கள் சுன்னத்து உண்டு.
'அஸருக்கு முன்னர் நான்கு ரக்அத்துக்கள் தொழுபவர் மீது அல்லாஹ் அருள் புரிவானாக!' என நபி(ச) அவர்கள் கூறினார்கள்.
அறிவிப்பவர்: இப்னு உமர்(வ)
ஆதாரம்: அபூதாவூத் 1271, திர்மிதி 430
(அறிஞர் அல்பானி இதனை ஹஸனான அறிவிப்பு என்கின்றார்.)
இந்த அடிப்படையில் அஸருக்கு முன்னர் நான்கும் தொழலாம்.
அஸருக்குப் பின்னர் நபி(ச) அவர்கள் இரண்டு ரக்அத்துக்கள் தொழுததாக அறிவிப்புக்கள் உள்ளன. (புஹாரி: 592)
இருப்பினும் அது நபி(ச) அவர்களுக் கென்று தனித்துவமான தொழுகையாகவே பார்க்கப்படுகின்றது. லுஹருடைய பின் சுன்னத்து தவறிவிட்டால் அஸருக்குப் பின்னர் சரி அதைக் கழா செய்யலாம் என்பதற்கு ஆதாரமாக நாம் குறிப்பிட்டுள்ள புஹாரியின் (1233) ஹதீஸ் அஸருக்குப் பின்னர் தொழுவது தடுக்கப்பட்டுள்ளது என்பதற்கு ஆதாரமாக உள்ளது என்பது குறிப்பிடத்தக்கதாகும்.
மஃரிபின் சுன்னத்து:
மஃரிபுக்கு முன்னர் விரும்பியவர்கள் இரண்டு ரக்அத்துக்கள் தொழுவது முஸ்தஹப் – விரும்பத்தக்கதாகும். இருப்பினும் இது வலியுறுத்தப்படவில்லை.
'மஃரிபுக்கு முன்னர் இரண்டு ரக்அத்துக்கள் தொழுங்கள் என்று நபி(ச) அவர்கள் கூறிவிட்டு பின்னர் விரும்பியவர்கள் மஃரிபுக்கு முன்னர் இரண்டு ரக்அத்துக்கள் தொழுங்கள் என்று கூறினார்கள். வலியுறுத்தப்பட்ட சுன்னத்தாக மக்கள் அதை எடுத்துக் கொள்வார்களோ என்று அஞ்சியே அப்படிக் கூறினார்கள்.'
அறிவிப்பவர்: அப்துல்லாஹ் இப்னுல் முஸனீ(வ),
ஆதாரம்: அபூதாவூத் 1281,
இப்னு குஸைமா 1289,
(அறிஞர் அல்பானி இதனை ஸஹீஹான அறிவிப்பு என்கின்றார்.
மஃரிபின் பின் சுன்னத்து:
மஃரிபுக்குப் பின் இரண்டு ரக்அத்துக்கள் சுன்னத்துத் தொழுவது வலியுறுத்தப்பட்ட சுன்னாவில் உள்ளதாகும். ஏற்கனவே நாம் குறிப்பிட்ட பல ஹதீஸ்களில் இது கூறப்பட்டுள்ளது. இந்தத் தொழுகையில் முதல் ரக்அத்தில் 'குல் யா அய்யுஹல் காபிரூனையும் இரண்டாம் ரக்அத்தில் குல்ஹுவல்லாஹு அஹதையும் ஓதுவது சுன்னாவாகும்.
இஷாவின் சுன்னத்து:
விரும்பியவர்கள் இஷாவுக்கு முன்னர் இரண்டு ரக்அத்துக்கள் தொழலாம். இஷாவுக்குப் பின்னர் இரண்டு ரக்அத்துக்கள் வலியுறுத்தப்பட்ட சுன்னத்தாகும். ஏற்கனவே நாம் குறிப்பிட்ட ஹதீஸ்கள் இதற்கான ஆதாரங்களாக அமைகின்றன.

http://www.islamkalvi.com/?p=104773

--

இது என் இறைவனின் அருட்கொடையிளிருந்து அருளப்பட்டதுwww.sahabudeen.com