லேபிள்கள்

சனி, 19 ஜூன், 2021

நவீனக்கொள்கைக் குழப்பங்களிலிருந்து எமது ஈமானைப் பாதுகாத்துக் கொள்வோம்

அஸ்ஸலாமு அலைக்கும் வரஹ்மதுல்லாஹி வபரகாதுஹூ..

அன்பார்ந்த சகோதரர்களே..!
அல்லாஹ்வால் இறுதித் தூதராக இந்த பூமிக்கு அனுப்பி வைக்கப்பட்ட முஹம்மதுர் ரஸுலுல்லாஹி ஸல்லல்லாஹு அலைஹிவஸல்லம் அவர்கள் தமது தூதுத்துவத்தை சரிவர நிறைவேற்றி எம்மை நேரான வெண்மையான பாதையில் விட்டுச் சென்றார்கள். அதன் இரவு கூட பகலைப் போன்றதாகும் . நபிகள் நாயகம் (ஸல்) அவர்களின் வபாத்திற்க்குப் பின்னர் நபித்தோழர்களின் காலத்திலேயே இஸ்லாத்தின் பெயரால் பல வழிகேடுகள் தோற்றம் பெற ஆரம்பித்து விட்டன. இது பற்றி அல்லாஹ்வின் தூதர் (ஸல்) அவர்கள் முன்னறிவுப்புச் செய்த செய்திகள் ஏறாளமானது.

அவ்வாறு தோற்றம் பெற்ற வழிகேடர்கள் அனைவரும் தாங்கள் தான் சத்தியவான்கள் என்பதை நிருவுவதற்குத் தங்களின் கொள்கைக்குச் சான்றாக அல் குர்ஆன் வசங்களையும் ஹதீஸ்களையும் மனோ இச்சைப்படி வளைத்து அதை சிறந்த விளக்கமாக முன்வைத்தார்கள். அது அன்றுடன் முற்றுப்பெற வில்லை. இன்றும் இஸ்லாத்தின் பெயரால் நவீனக் கொள்கைகளைத் தோற்றுவிக்கக் கூடியவர்கள் அல் குர்ஆன் வசனங்களையும் ஹதீஸ்களையும் தவறாக சித்தரித்து தங்களின் நவீன சிந்தனைகளை ஆய்வாகச் சமூகத்துக்கு முன்வைக்கின்றார்காள். இது கியாம நாள்வரை தொடரக்கூடிய ஒன்றாகும்.

எனவே நேரான பாதையை நாம் எப்படி அடையாளம் காண்பது? என்ற அறிவு எம்மிடமிருப்பது அவசியமாகும். இல்லையெனில் வழிகேடுகளை ஆதரிக்கும் நிலை எம்மிலும் ஏற்பட்டு விடலாம். அல்லாஹ் எம் அனைவருக்கும் நேரான பாதையை காட்டுவானாக.

நேரான பாதை என்பது நேற்று இன்று உருவான புதுப்பாதை கிடையாது 1400 ஆண்டுகளுக்கு முன்னர் நபிகளாரும் நபித்தோழர்களும் எந்தக் கொள்கையில் இருந்தார்களோ அதுவே நேரான பாதையாகும். (அல் குர்ஆன் , அல் ஹதீஸ் ). அந்த நேரான பாதையைத்தான் சிறந்த மூன்று நூற்றாண்டில் வாழ்ந்து மரணித்த நல்லறிஞர்களும் வாழ்க்கை நெறியாகக் கொண்டார்கள். எனவே அதே வழியில் மறுமைவரை அவர்களைப் பின்தொடர்வோர் அஹ்லுஸ் ஸுன்னவைச் சார்ந்தோர்களாவார்கள்.

அஹ்லுஸ் ஸுன்னாக் கொள்கைசார்ந்த அறிஞர்கள் (ஸலபுகள்) எப்படி அல்குர்ஆன் ஹதீஸை விளங்கினார்களோ அவ்வாறு புரிவது தான் எம்மை நேரான பாதையில் நிலைக்கச் செய்யும் காரியமாகும். இதற்கு மாற்றமாக அல்குர்ஆன், ஹதீஸை யாரெல்லாம் மனோ இச்சைப்படி விளங்க முற்படுகின்றார்களோ அத்தகையோர் பல வழிகேடுகளைத் தோற்றுவிப்பார்கள்.

இன்று தமிழுலகில் ஆங்கிலத்திலிருந்து மொழிபெயர்க்கப்பட்டு இணையத்தினூடாக மெல்ல வளர்ந்து வரும் வழிகெட்ட கொள்கையாக சுப்பர் முஸ்லிம் (Super muslim) என்ற பெயரில் இயங்குவோரால் முன்வைக்கப்படும் கொள்கையை அடையாளப்படுத்தலாம். இவர்களை ஆதரிக்கும் சிறு ரசிகர்கூட்டம் இன்று உருவாகியுள்ளது.

இவர்கள் கிஃலாபத்தை நபித்துவத்தின் பிரதான நோக்கமாக சித்தரிக்கக்கூடிய, அகீதாவில் வழிதவறிச் சென்று கொண்டுள்ள அமைப்புக்களின் கருத்துக்களைத் திருடி நவீன கால ஆய்வாக தாம் இணையத்தின் வாயிலாகத் திருடிய அந்த சிந்தனைகளைத் தமது ஆய்வைப்போல் இளைஞர்களைக் கவரும் விதத்தில் முன்வைத்து வருகின்றார்கள்.

குழப்பங்கள் நிறைந்து காணப்படும் இன்றைய காலகட்டத்தில் மக்கள் எதிர்பாக்கும் தலைப்புக்களை தெரிவு செய்து அந்த தலைப்புக்களில் அஹ்லுஸ் ஸுன்னாக் கொள்கையின் நிலைப்பாட்டுக்கு மாற்றாமான கருத்துக்களைக் குர்ஆன், ஹதீஸிலிருந்து பெறப்பட்ட துள்ளியமான ஆய்வாக முன்வைப்பதே இவர்களின் தந்திரமாகும்.

ஈமானுக்கு வேட்டு வைக்க இவர்கள் தேர்ந்தெடுத்துள்ள தலைப்புக்கள்:

1)அஹ்லுஸ் ஸுன்னா வல் ஜமாஹ் என்போர் பற்றி தவறான விளக்கம் (?)

2)2050ற்குள் தஜ்ஜாலின் வருகை( ?)

3)யஹ்ஜுஜ் மஹ்ஜுஜ் வெளிப்பட்டுவிட்டார்கள்.(?)

4)அடிமை தன் எஜமானியை பெற்றெடுப்பாள் என்பது டெஸ்ட் டியூப் பேபி முறை.(?)

5)நபிமார்களின் தஃவா கிலாபத்தை இலக்காக கொண்டது (?)

6)ஷைத்தானின் கொம்பு என்பது ஸஊதியின் எழுச்சி.(.?)

7)கியாமநாள் பற்றிய முன்னறிவிப்புகளை நிதர்சனத்தை வைத்தே அனுக வேண்டும்(..?)

8)மார்கத்தை ஆய்வு செய்ய மௌலவியாக தேவையில்லை (?)

9)சூரியன் மேற்கில் உதித்துவிட்டது தௌபாக்கள் இனி ஏற்கப்படாது(?)

10)அதிசயப்பிராணி என்பது இஸ்ரேலின் ஆட்சி(.?)

11)நபி (ஸல்) அவர்கள் வந்தது கிலாபத்தை நிலைநாட்ட..(?)

12) முற்படுத்த வேண்டியது அகீதா இல்லை ஆட்சியே..(?)

13)ஸஊதியை ஸலபுகள் கண்மூடித்தனமாக ஆதரிக்கிறார்கள்..(?)
(மற்றும் பல வழிகேடுகள்… )

மேற் கூறப்பட்ட தலைப்புக்களில் குர்ஆன், ஹதீஸை தவறாகச் சித்தரித்து முற்று முழுதாக அஹ்லுஸ் ஸுன்னாக் கொள்கைக்கு மாற்றமான கருத்துக்களை மக்கள் மத்தியில் முன்வைத்துக் கொண்டிருக்கிறது இந்த சுப்பர் முஸ்லிம் எனும் வழிகெடுக்கும் குளுமார்கத்தை சரிவரப் படிக்காத இளைஞர்கள் பலர் இவர்களின் ஷைத்தானிய வழியில் சிக்கும் பேராபத்தான நிலை இன்று உருவாகியுள்ளது என்பதை இவர்களின் யூடீயூப் செனலின் Subscribersஸைப் பார்போர் அறிந்து கொள்ள முடியும்.

எனவே இந்த நவீன வழிகேட்டைக் கண்டு கொள்ளாவிட்டால் இரத்தம் கொதிக்கும் நம் இளைஞர்களுக்கும் ,சமூகத்துக்கும் நாம் செய்யும் மிகப்பெரிய தீங்காகவே மாறிவிடும். சில வழிகேடுகள் வளர எமது புறக்கணிப்புக்களும் காரணமாக இருந்துள்ளமை நாம் மறுக்க முடியாத கடந்தகால வரலாற்றுண்மையாகும்.

அல்லாஹ்வின் உதவியால் இந்த நவீன வழிகேட்டை முளையிலேயே கிள்ளி எறிந்து இது போன்று இன்னுமுள்ள வழிகேடுகளை நோக்கி மக்களை அழைக்கும் அழைப்பாளர்களிடமிருந்து முஸ்லிம் சாமூகத்தைக் காக்க வேண்டும் என்ற தூய எண்ணத்தில் இஹ்லாஸுடன் இப்பணிக்காகச் செயற்பட திறமைமிக்க உலமாக்கள் ஒன்றிணைந்துள்ளார்கள்இன்ஷா அல்லாஹ் ஸபீலுல் முஃமினீன் என்ற பெயரிலுள்ள எமது முகநூல் பேஜ் மற்றும் யூடியூப் செனல் , வாட்ஸப் குளுமம் போன்ற இன்னுமுள்ள இணையதளங்களினூடாகவும் அஹ்லுஸ்ஸுன்னாவுக்கு மாற்றமான கொள்கைச் செயற்பாடுகளைக் கொண்ட பிரிவினருக்குறிய மறுப்புக்களைத் தொடர்ந்தும் எதிர்பாருங்கள்.

رَبَّنَا لَا تُزِغْ قُلُوْبَنَا بَعْدَ اِذْ هَدَيْتَنَا وَهَبْ لَنَا مِنْ لَّدُنْكَ رَحْمَةًاِنَّكَ اَنْتَ الْوَهَّابُ‏
"எங்கள் எஜமானே.! எங்களை நீ நேர்வழியில் செலுத்திய பின்பு எங்கள் இதயங்களை நேர்வழியிலிருந்து பிறழச் செய்திடாதே! மேலும், எங்களுக்கு உன் அருளிலிருந்து கொடை வழங்குவாயாக! திண்ணமாக, நீயே உண்மையில் தாராளமாக வழங்குபவனாய் இருக்கின்றாய்.
(அல்குர்ஆன் : 3:8)

எமது Face book மற்றும் YouTube தளத்தின்

லின்க்:

https://www.youtube.com/channel/UCgxokWl1qJWEGV0_YXRpOuA

https://www.facebook.com/Sabeelulmumineenofficial/

SABEELUL MU'MINEEN

👆follow this In Sha Allah

http://www.islamkalvi.com/?p=124142


--
இது என் இறைவனின் அருட்கொடையிளிருந்து அருளப்பட்டது
www.sahabudeen.com

புதன், 16 ஜூன், 2021

கேட்போருக்கும்கேட்காதோருக்கும் உதவுங்கள்

ஆக்கம். மவ்லவி. தாஹா ஃபைஜி அழைப்பாளர், சென்னை

சமுதாயத்தில் சில நபர்களுக்கு பொருளாதாரத்தை அதிகமாகவும் இன்னும் சில நபர்களுக்கு பொருளாதாரத்தை குறைவாகவும் அல்லாஹ் வழங்கி இருக்கின்றான்.

அல்லாஹ் நாடியிருந்தால் ஒட்டுமொத்த மனிதர்களையும் பெரும் பணக்காரர்களாக ஆக்கியிருக்கலாம் அல்லது அனைவரையும் ஏழையாக ஆகியிருக்கலாம் ஆனால் சில மனிதர்களை பணக்காரனாகவும், சில மனிதர்களை ஏழைகளாகவும் ஆக்கியிருக்கின்றான். இது ஏன் என்பதை அல்லாஹ் நமக்குத் தெளிவுபடுத்துகிறான்.

நிச்சயமாக அல்லாஹ் தான் நாடியோருக்கு ரிஸ்க்கை ஆகார வசதிகளை விசாலமாக்குகிறான்; (தான் நாடியோருக்குச்) சுருக்கியும் விடுகிறான் என்பதை அவர்கள் பார்க்க வில்லையா? நிச்சயமாக ஈமான் கொண்டுள்ள சமூகத்திற்கு இதில் அத்தாட்சிகள் இருக்கின்றன.
(ஆல்குர்ஆன் 30: 37)

மனித சமுதாயத்தில் பொருளாதார ரீதியாக ஒரு வித்தியாசம் எதற்காக அமைக்கப்படவேண்டும் என்று அடுத்த வசனத்தில் குறிப்பிடுகின்ற பொழுது, பொருளாதாரம் இருப்பவர்கள் இல்லாதவர்களுக்கு கொடுத்து உதவவேண்டும் என்பதை அல்லாஹ் அறிவுறுத்துகின்றான்.

ஆகவே, உறவினர்களுக்கு அவர்கள் பாத்தியதையைக் கொடுத்து வருவீராக. அவ்வாறே ஏழைகளுக்கும், வழிப்போக்கர்களுக்கும் (அவரவருக்குரியதை கொடுத்து வருவீராக); எவர்கள் அல்லாஹ்வின் திருப்பொருத்தத்தை நாடுகிறார்களோ அவர்களுக்கு இது மிக்க நன்மையுடையதாகும்; அவர்கள் தாம் (அவ்வாறு கொடுத்து வருபவர் தாம்) வெற்றியாளர்களாவார்கள். (அல்குர்ஆன் 30: 38)

தற்போது உலக அளவில் ஏராளமான மக்கள் வாழ்வியல் நெருக்கடியை சந்தித்துக் கொண்டிருக்கின்றனர். பிறரிடமிருந்து எதிர் பார்க்காதவர்கள் கூட பிறரிடத்தில் எதிர்பார்க்கக்கூடிய சூழ்நிலைக்கு தள்ளப்பட்டு விட்டார்கள். காரணம் கொரோனா என்று சொல்லக்கூடிய வைரஸ் உலகத்தையே ஆட்கொண்டு மனித சமுதாயத்தை அச்சுறுத்தி வைத்திருக்கின்றது. யாரும் வெளியில் சென்று வேலை செய்யக்கூடாது என அந்தந்த நாட்டு அரசாங்கம் மக்களின் நலன் கருதி கட்டளையிடுகிறது. இதில் செல்வந்தர்கள் பொருளாதார நெருக்கடியில் இருந்து தப்பித்து விட்டார்கள். ஆனால் ஏழைகளோ வசமாக சிக்கிக் கொண்டார்கள். குறிப்பிட்டு சொல்ல வேண்டுமென்றால் அன்றாடங்காய்ச்சிகளாக இருக்கக்கூடிய மக்கள் ஒருவேளை உணவுகூட கிடைக்காமல் பட்டினிச் சாவுகளை சந்திப்பதை பார்க்கின்றோம்.

பல மக்களுக்கு தேவை ஏற்படக்கூடிய இந்த சூழ்நிலையில்தான் நாம் அதிகமதிகம் அல்லாஹ்வின் பாதையில் தர்மம் கொடுக்க கடமைப் பட்டிருக்கின்றோம். முஸ்லிம் சமூகத்திற்கென்று ஒரு அடையாளம் இருக்கிறது. அதுதான் ரமலான் மாதத்தில் அதிகமதிகம் தான தர்மங்களை மேற்கொள்வது. ஏனென்றால் நபிகள் நாயகம் (ஸல்) அவர்கள் ரமலான் மாதத்தில் மழை, காற்றை விட வேகமாக தர்மங்களை செய்வார்கள் (நூல் புகாரி).

நபித்தோழர்கள் வசதியில் குறைவானவர்களாக இருந்தாலுங்கூட கொடுப்பதிலே, இல்லாதோருக்கு உதவுவதிலே அவர்கள் உயர்வானவர்கள். அதனால் தான் யாருக்கு செலவழிக்க வேண்டும் எதனை செலவழிக்க வேண்டும் என்று நபியவர்களிடத்திலே கேட்டார்கள். அப்பொழுது அல்லாஹ் இந்த வசனத்தை இறக்குகிறான்

நபியே! (பொருள்களில்) "எதைச் செலவு செய்வது? (யாருக்குக் கொடுப்பது?)" என்று உங்களிடம் கேட்கின்றனர். (அதற்கு) நீங்கள் கூறுங்கள்: (நன்மையைக் கருதி) "நீங்கள் எத்தகைய பொருளைச் செலவு செய்தபோதிலும் (அதனைத்) தாய், தந்தை, சுற்றத்தார், அநாதைகள், ஏழைகள், வழிப்போக்கர்கள் ஆகியோருக்குக் கொடுங்கள். இன்னும், நீங்கள் (வேறு) என்ன நன்மையைச் செய்தபோதிலும் அதனையும் நிச்சயமாக அல்லாஹ் அறி(ந்து அதற்குரிய கூலியும் தரு)வான்.
(அல்குர்ஆன் : 2:215)

இந்தச் சூழ்நிலையில் நாம் நினைக்க மறந்த ஒரு கூட்டத்தினர் தான் அல்லாஹ்வினுடைய பணியில் இருப்பவர்கள். அவர்கள் கண்ணியமானவர்கள் யாரிடத்திலும் அவர்கள் வெளிப்படையாக கேட்க மாட்டார்கள். ஆனால் அவர்களுக்கு கொடுப்பது மிகவும் சிறந்தது என்று அல்லாஹ் குறிப்பிடுகின்றான்.

(நம்பிக்கையாளர்களே!) சில ஏழைகள் இருக்கின்றனர். அவர்கள் அல்லாஹ்வுடைய மார்க்கத்திற்கென்றே தங்களை (முற்றிலும் அர்ப்பணம் செய்து) ஒதுக்கிக் கொண்டதால் (தங்கள் சொந்த வாழ்விற்குத் தேடக்கூட) பூமியில் நடமாட சாத்தியப் படாதவர்களாக இருக்கின்றனர். (அன்றி, அவர்கள்) யாசிக்காததால் (அவர்களின் வறுமை நிலையை) அறியாதவர்கள். அவர்களை செல்வந்தர்களென எண்ணிக் கொள்கின்றனர். அவர்களுடைய (வறுமையின்) அடையாளங்(களாகிய ஆடை, இருப்பிடம் ஆகியவை)களைக் கொண்டு நீங்கள் அவர்களை அறிந்து கொள்ளலாம். அவர்கள் மனிதர்களிடத்தில் வருந்தியும் கேட்க மாட்டார்கள். (இத்தகைய ஏழைகளுக்கு) நீங்கள் நல்லதில் இருந்து எதைச்செலவு செய்தபோதிலும் நிச்சயமாக அல்லாஹ் அதை நன்கறி(ந்து அதற்குரிய கூலியை உங்களுக்குத் தரு)வான்.
(அல்குர்ஆன் : 2:273)

பல மக்கள் தங்களுடைய தேவைகளை வெளியே சொல்லாமல் தங்களிடமிருப்பதை வைத்துக்கொண்டு கஷ்ட நஷ்டங்களை சமாளித்துக் கொள்கின்றார்கள். அவர்களுக்கு தேவை இருக்கின்றது என்றாலும் அவர்கள் வெளியே யாரிடமும் கேட்பதில்லை. அல்லாஹுத்தஆலா உங்களிடத்தில் வலிந்து கேட்காதோருக்கும் கொடுங்கள் என்பதாக குர்பானியினுடைய இறைச்சி விஷயத்தில் நமக்கு ஏவுகிறான்.

….அதிலிருந்து நீங்களும் புசியுங்கள். அதைக் கேட்டவர்களுக்கும், கேட்காதவர்களுக்கும் கொடுங்கள். நீங்கள் நன்றி செலுத்தும் பொருட்டு இவ்வாறு அதனை உங்களுக்கு வசப்படுத்தித் தந்தோம். (அல்குர்ஆன் : 22:36)

இப்படிப்பட்ட இந்த மக்களுக்குத்தான் நாம் வாரி வழங்க வேண்டும். நாம் குறைத்து குறைத்து, எண்ணி எண்ணி கொடுத்தால் என்ன ஆகும் என்பதை ஒரு நபிமொழி நமக்கு எச்சரிக்கிறது.

அஸ்மா(ரலி) அறிவித்தார்.
'நபி(ஸல்) அவர்கள் என்னிடம் 'நீ (தர்மம் செய்யாமல்) முடிந்து வைத்துக் கொள்ளாதே! அவ்வாறு செய்தால் (இறைவனின் கொடை) உனக்கு (வழங்கப்படாமல்) முடிந்து வைத்துக் கொள்ளப்படும்!' எனக் கூறினார்கள். 'அப்தாவின் அறிவிப்பில், 'நீ (இவ்வளவுதான் என்று) வரையறுத்து (தர்மம்) செய்யாதே! அல்லாஹ் (உன் மீது பொழியும் அருளை) வரையறுத்து விடுவான்' எனக் கூறினார்கள் என உள்ளது. (ஸஹீஹ் புகாரி.)

அல்லாஹ்வின் பாதையில் உதவி செய்பவர்கள் எந்த நிலையிலும் செய்யலாம். இரகசியமாகவோ பகிரங்கமாகவோ குறைவாகவோ அதிகமாகவோ எவ்வாறு வேண்டுமென்றாலும் அவர்கள் தர்மங்களை கொடுக்கலாம். அது அனைத்துமே அவர்களுக்கு மகத்தான கூலியைப் பெற்றுத்தரும்.

யார் தங்கள் பொருள்களை (தான தர்மங்களில் )இரவிலும், பகலிலும் இரகசியமாகவும் பகிரங்கமாகவும் செலவு செய்கின்றார்களோ அவர்களுக்கு அவர்களுடைய இறைவனிடத்தில் நற்கூலி இருக்கிறது. அவர்களுக்கு அச்சமும் இல்லை. அவர்கள் துக்கப்படவும் மாட்டார்கள். (அல்குர்ஆன் 2:274)

சஹாபாக்களினுடைய தானதர்மங்கள் மகத்தானது. தங்களுக்கு தீங்கிழைத்த மனிதர்களுக்குகூட உதவிகளை செய்து வந்தார்கள். அபூபக்கர் (ரலி) அவர்களுடைய சம்பவம் நமக்கு மிகப்பெரிய படிப்பினையை தருகிறது. அன்னை ஆயிஷா (ரலி) அவர்களின் மீது நயவஞ்சகர்கள் அவதூறு கூறி இட்டுக்கட்டினார்கள் உண்மை நிலை அறியாமல் சில சஹாபாக்கள் அதில் சம்பந்தப்பட்டார்கள்.
அதில் ஒருவர்தான் அபூபக்கர் (ரலி) மூலமாக உதவி பெற்று வந்த மிஸ்தஹ் (ரலி) அவர்கள்.

இது தெரிந்த அபூபக்கர் ரலி அவர்கள் இனிமேல் நான் உதவியே செய்யமாட்டேன் என்று அல்லாஹ்வின் மீது சத்தியம் செய்தார்கள்.

அல்லாஹ் வசனத்தை இறக்குகிறான்..
இன்னும், உங்களில் (இறைவனின்) கொடை அருளப் பெற்றவர்களும், தக்க வசதி உடையவர்களும், உறவினர்களுக்கும் ஏழைகளுக்கும், (தம்மிடங்களை விட்டு) அல்லாஹ்வின் பாதையில் ஹிஜ்ரத் செய்தவர்களுக்கும் (எதுவும்) கொடுக்க முடியாது என்று சத்தியம் செய்ய வேண்டாம்; (அவர்கள் தவறு செய்திருப்பின்) அதை மன்னித்து (அதைப்) பொருட்படுத்தாமல் இருக்கவும்; அல்லாஹ் உங்களை மன்னிக்க வேண்டும் என்று நீங்கள் விரும்ப மாட்டீர்களா? மேலும் அல்லாஹ் (பிழை பொறுப்பவன்) மிக மன்னிப்பவன்; அன்பு மிக்கவன். (அல்குர்ஆன் 24: 22)

இந்த வசனம் இறங்கிய உடன் அபூபக்கர் ரலி அவர்கள் தன் நிலைப்பாட்டை மாற்றிக் கொள்கிறார்கள்.
"ஆம்! அல்லாஹ்வின் மீதாணையாக! அல்லாஹ் எனக்கு மன்னிப்பளிக்க வேண்டும் என்று நான் விரும்புகின்றேன்" என்று கூறிவிட்டு மிஸ்தஹுக்கு ஏற்கனவே தாம் செலவிட்டு வந்ததைத் திரும்பவும் தொடரலானார்கள். மேலும், "அல்லாஹ்வின் மீதாணையாக! அவருக்கு (செய்யும் இந்த உதவியை) ஒரு போதும் நான் நிறுத்த மாட்டேன்" என்று கூறினார்கள். (நூல் : புகாரி- 6679)

நாம் சம்பாதித்த அல்லது நம்மிடத்தில் இருக்கக்கூடிய சொத்து மற்றும் செல்வங்களின் நற்பலனை அடைய வேண்டுமென்றால் அது நமது கையில் இருக்கும்போதே தான தர்மங்களை செய்ய வேண்டும் இல்லையென்றால் அது வேறொரு நபருக்குறியதாகி விடும்.

நபி (ஸல்) அவர்கள், "உங்களில் யாருக்காவது தமது செல்வத்தை விட தமது வாரிசுகளின் செல்வம் விருப்பமுடையதாக இருக்குமா?" என்று கேட்டார்கள். தோழர்கள், "அல்லாஹ்வின் தூதரே! எங்கள் அனைவருக்குமே எங்களின் செல்வம் தான் விருப்பமானதாகும்" என்று பதிலளித்தார்கள். "அவ்வாறாயின் ஒருவர் (இறப்பதற்கு முன் அறவழியில்) எதைச் செலவிட்டாரோ அது தான் அவரது செல்வமாகும். (இறக்கும் போது) எதைவிட்டுச் செல்கின்றாரோ அது அவருடைய வாரிசுகளின் செல்வமாகும்" என்று நபி (ஸல்) அவர்கள் கூறினார்கள். (நூல் : புகாரி 6442)

இப்போது தான் தர்மங்களை பெற்றுக்கொள்ள ஏழைகளும் தேவை உடையோரும் இருக்கின்றார்கள். சதகாவின் உடைய நன்மைகளையும் அறிந்து வைத்திருக்கின்றோம். இப்போதே தர்மம் செய்தால்தான் நமக்கு நன்மை, இல்லையென்றால்..

இறைத்தூதர்(ஸல்) அவர்கள் கூறினார்கள்:
தர்மம் செய்யுங்கள்! ஏனெனில் உங்களிடையே ஒரு காலம் வரும். அப்போது ஒருவன் தன்னுடைய தர்மப் பொருளை எடுத்துக் கொண்டு அலைவான். அதைப் பெறுவதற்கு யாரும் இருக்க மாட்டார். அப்போது ஒருவன், நேற்றே இதை நீ கொண்டு வந்திருந்தாலாவது நான் வாங்கியிருப்பேனே. இன்றோ அது எனக்குத் தேவையில்லை என்று கூறிவிடுவார். (நூல் புகாரி -1411.)

மலக்குமார்களுடைய துஆவை பெற்றுக் கொள்ள நாம் விரும்புகின்றோமா.? அல்லது சாபத்தை எதிர்பார்க்கின்றோமா?

ஒவ்வொரு நாளும் இரண்டு மலக்குகள் இறங்குகின்றனர். அவ்விருவரில் ஒருவர், "அல்லாஹ்வே!

தர்மம் செய்பவருக்குப் பிரதிபலனை அளித்திடுவாயாக! என்று கூறுவார். இன்னொருவர், "அல்லாஹ்வே! (தர்மம் செய்யாமல்) தடுத்து வைத்துக் கொள்பவர்களுக்கு அழிவை ஏற்படுத்துவாயாக! என்று கூறுவார் என்று அல்லாஹ்வின் தூதர் (ஸல்) அவர்கள் கூறினார்கள். (நூல்: புகாரி 1442)

அல்லாஹ்விடம் நன்மையை எதிர்பார்த்து அதிகமதிகம் உதவிகளை செய்வோம் இயலாத முடியாத பொருளாதாரத்தில் பலகீனமான மக்களை தேடிச்சென்று உதவுவோம்.

http://www.islamkalvi.com/?p=124189


--
இது என் இறைவனின் அருட்கொடையிளிருந்து அருளப்பட்டது
www.sahabudeen.com

ஞாயிறு, 13 ஜூன், 2021

முகத்தால்நடப்பவன்!

முகம் மனித உடலில் ஒரு முக்கியப் பகுதியாகும். தலையின் முன் பகுதியாக அமைந்திருப்பது முகம். பலவித புலன்களுக்குரிய உறுப்புக்கள் அதாவது பார்க்கும் திறன்கொண்ட கண், உயிர் வாழச் சுவாசிக்கும் திறன்கொண்ட மூக்கு, கேட்கும் திறன்கொண்ட காது, உண்ணுபதற்கும் அழகாகப் பேசுவதற்கும் பயன்படுத்தப்படும் வாய், அழகிய தோற்றத்தை வெளிப்படுத்தும் கன்னங்கள், இன்னும் சிரம் பணிவதில் முதலிடம் வகிக்கும் நெற்றி, போன்ற முக்கிய உருப்புக்களைக் கொண்டது முகம்.

மனிதன் தன் குணம் சார்ந்த சில உணர்ச்சிகளைத் தனது முகத்தின் மூலமாக வெளிப்படுத்துவதால் முகபாவம் என்ற சொல் வந்தது. மனிதனை அடையாளப்படுத்துவது முகம். மனிதன் தன்னை அழகுபடுத்திக்கொள்வதில் முதன்மைப் பகுதி முகம். அடையாள அட்டைகளில் முகம், சொல் வழக்கிலும் முகவர், முகன்மை, முகமன், முகவரி, முகவுரை, முகமலர்ச்சி, முகப்பொலிவு, முகத்திரை, முகமூடி, துறைமுகம்…, இப்படியாக முகத்தின் சிறப்புக்களைச்  சொல்லிக்கொண்டே போகலாம்.

போர் சமயங்களில் எதிரிகளின் முகத்தைக் காயப்படுத்திச் சிதைப்பதையும், மனைவியைக் கண்டிக்கும் சமயம் முகத்தில் அடிப்பதையும் இஸ்லாம் தடைசெய்துள்ளது, ஆக மனித உடலில்

சிறப்பும் முக்கியத்துவமும் வாய்ந்த பகுதி முகம்.

மனிதன் மிகவும் மோசமான கரடுமுரடான பாதையில் பயணிக்கும்போது தலையைக் கீழே குனிந்து முகங்குப்புற பார்வையை தாழ்த்தித் தள்ளாடித் தள்ளாடிப் போவான். தான் எங்கே செல்கின்றோம் என்பதுகூட அவனுக்குத் தெரியாது தான் செல்லும் வழியறியாது திசைமாறிப் போய்விடுவான்.  எத்தனையோ பேர் அந்தக் கரடுமுரடான பாதையைக் கடக்க முடியாமல் கீழே விழுந்து அடிபட்டுப்போவர்.

ஆனால் ஒருவன் சமதளமான பாதையில் பயணிக்கும்போது அவன் தலை குனிய வேண்டியதில்லை, முகத்தைக் குப்புறத் தாழ்த்த வேண்டியதில்லை, நெஞ்சியை நிமிர்த்தி நேர்கொண்ட பார்வையோடு, நிமிர்ந்தவாறு விரைவாகப் பயணிப்பான், சிரமங்கள் இல்லாமல் தன் இலக்கை எளிதாக அடைந்துவிடுவான்.

இந்த இருவரும் சமமானவர்களா?

اَفَمَنْ يَّمْشِىْ مُكِبًّا عَلٰى وَجْهِهٖۤ اَهْدٰٓى اَمَّنْ يَّمْشِىْ سَوِيًّا عَلٰى صِرَاطٍ مُّسْتَقِيْمٍ

(சற்று சிந்தித்துப் பாருங்கள்) கரடுமுரடான பாதையில் முகங்குப்புற குனிந்தவாறு நடந்துசெல்பவன் நேர்வழியில் உள்ளவனா? அல்லது சமதளப் பாதையில் தலை நிமிர்ந்தவாறு நடந்துசெல்ப(வன் நேர்வழியில் உள்ள)வனா? (அல்குர்ஆன்:- 67:22) 

கரடுமுரடான பாதையில் முகங்குப்புற பயணித்துத் தட்டுத்தடுமாறித் திசைமாறிச் செல்லக் கூடியவனை இறைநிராகரிப்பாளனுக்கும், சமதளப்பாதையில் நேரானப்  பார்வைகொண்ட, தலை நிமிர்ந்தவாறு பயணிப்பவனை இறை நம்பிக்கையாளனுக்கும் அல்லாஹ் உதாரணம் கூறி புரியவைக்கின்றான்.

அல்குர்ஆன் இறங்கிய காலகட்டத்தில் வாழ்ந்த மக்கள் தங்களின் பயணங்களுக்காக ஒட்டகம் குதிரை கோவேறு கழுதைகளைப் பயன்படுத்தினாலும், அவர்கள் தங்கள் கால்களால் நடந்து அதிக தூரங்களைக் கடந்தார்கள். கால்நடைகளில் அவர்கள் பயணித்ததைவிட தங்கள் கால்களால் நடந்து பயணித்த தூரங்கள் அதிகம். ஆகவே அவர்களின் அனுபவங்களிலிருந்தே அழகான உதாரணங்களைச் சொல்லி அல்லாஹ் அவர்களுக்குப் புரியவைக்கின்றான்.

இறைநிராகரிப்பாளனைப் பொறுத்தவரை மறுமை நாளில் முகங்குப்புற குனிந்தவாறுதான் நரகத்தை நோக்கி இழுத்துச் செல்லப்படுவான்! இறைநம்பிக்கையாளனோ சமதளமான விரிவான பாதையில் தலை நிமிர்ந்து சுவனத்தை நோக்கி நடந்து செல்வார்.

கால்களால்

நடக்கும் மனிதர்களை நாம் கண்டுள்ளோம், இன்னும் (தலைகீழாக) அதாவது கரங்களைத் தரையில் ஊன்றியவாறு நடப்பவனையும் கண்டுள்ளோம். ஆனால் தங்களின் முகங்களால் நடப்பவர்களை யாராவது பார்த்ததுண்டா..?

http://www.islamkalvi.com/?p=124171


--
இது என் இறைவனின் அருட்கொடையிளிருந்து அருளப்பட்டது
www.sahabudeen.com

புதன், 9 ஜூன், 2021

அல்லாஹ்வின்உதவி யாருக்கு?

கஷ்ட நேரங்களிலும் சோதனை கட்டங்களிலும் அல்லாஹ்வின் உதவியும் வெற்றியும் விரைவாக கிடைக்கவேண்டுமென்பது முஃமின்கள் அனைவரின் எதிர்பார்ப்பும், பிரார்த்தனையுமாகும். எப்போதெல்லாம் முஸ்லிம் சமுதாயம் நெருக்கடிகளுக்கும் அடக்குமுறைக்கும் ஆளாக்கப்படுவார்களோ அப்போதெல்லாம் அல்லாஹ்வின் உதவி எப்போது வரும் என்பது தான் அவர்களின் முழக்கமாக இருக்கும் இந்த முழக்கத்தை நபிமார்களுக்கு அடுத்தபடியாக இந்த சமுதாயத்தின் சிறந்தவர்களாக இருந்த நபித்தோழர்கள் சோதனைகளுக்கு ஆளாக்கப்பட்டும் மிக கடுமையான முறையில் உலுக்கப்பட்டும் எதிரிகளால் நான்கு புறங்களிலும் சூழப்பட்டு அவார்களின் உயிர் தொண்டைக்குழியை அடைந்த தருணத்தில் அவர்கள் எழுப்பிய முழக்கமாகும்.

அல்லாஹ் கூறுகிறான், உங்களுக்கு முன்னே சென்று போனவர்களுக்கு ஏற்பட்ட சோதனைகள் உங்களுக்கு வராமலேயே சுவர்க்கத்தை அடைந்து விடலாம் என்று நீங்கள் எண்ணுகிறீர்களா? அவர்களை (வறுமை, பிணி போன்ற) கஷ்டங்களும் துன்பங்களும் பீடித்தன; "அல்லாஹ்வின் உதவி எப்பொழுது வரும்" என்று தூதரும் அவரோடு ஈமான் கொண்டவர்களும் கூறும் அளவுக்கு அவர்கள் அலைகழிக்கப்பட்டார்கள்; "நிச்சயமாக அல்லாஹ்வின் உதவி சமீபத்திலேயே இருக்கிறது" (என்று நாம் ஆறுதல் கூறினோம்.) (அல்குர்ஆன் 2:214)

இவ்வசனத்தில் முஸ்லிம்களுக்கு சோதனைகளும் நெருக்கடிகளும் எற்படும்போது அதிலிருந்து மீளுவதற்காக அல்லாஹ்விடம் உதவி கோரவேண்டும் அப்படி உதவி கோரினால் அல்லாஹ் உதவி செய்வான் என்று வாக்களிக்கிறான் இன்னும், முஸ்லிம்களோடு போர் தொடுக்கும் எதிரிகளான காஃபிர்களுக்கு எதிராக அல்லாஹ் உதவி செய்வான் என்பதும் அவனது வாக்குறுதியாகும்.

இந்த வசனத்தில் சொல்லப்பட்டுள்ள சில பயன்கள் குறித்து அஷ்ஷேக் ஸாலிஹ் அல் உஸைமின் (ரஹ்) அவர்கள் கூறினார்கள்

  1. உதவியை மனிதன் அதை செய்வதற்கு ஆற்றலுடையவனிடம் தான் கேட்க வேண்டும் அது அல்லாஹ் மட்டும் தான்
  2. தூதர்களின் வழிதான் தூதர்களை நம்பிக்கைக்கொண்டவர்களின் வழிமுறையும். அவர்கள் கூறியதைத்தான் நம்பிக்கையாளர்களும் கூறவேண்டும். "அல்லாஹ்வின் உதவி எப்பொழுது வரும்" என்று தூதரும் அவரோடு ஈமான் கொண்டவர்களும் கூறும் அளவுக்கு"
  3. அல்லாஹ்வின் பரிபூரண ஆற்றலை உறுதி செய்வது. "நிச்சயமாக அல்லாஹ்வின் உதவி சமீபத்திலேயே இருக்கிறது"
  4. உதவி சமீபத்திலே இருந்தாலும் குறிப்பிட்ட காலத்திற்கு அல்லாஹ் அதனை தாமதிப்பது அவனது ஹிக்மத்தாகும்.
  5. அல்லாஹ்விற்காக சோதனைகளை பொறுமையாக தாங்கிக்கொள்வது சொர்க்கத்தில் நுழைய காரணமாகும். சொர்க்கத்தில் நுழையும் வரை பொறுமையாக இருங்கள் என்பது தான் இவ்வசனத்தின் பொருளாகும்.
  6. உதவியைக்குறித்து முஃமின்களுக்கு நற்செய்தியை கூறுகிறது தங்களுக்கு சொல்லப்பட்ட நற்செய்தியை எதிர்பார்த்து அல்லாஹ்வின் பாதையில் போராடுபவர்கள் அதில் உறுதியாக இருப்பதற்கு இது அவர்களுக்கு வலிமையாக்குகிறது. (தஃப்ஸீர் சூரத்துல் பகரா)

அல்லாஹ்வின் உதவி ஈமானை வாதிடுபவர்களுக்கோ,இஸ்லாமை வாதிடுபவர்களுக்கோ கிடைக்கக்கூடியதல்ல மாறாக யார் உள்ளத்தில் ஈமானை உறுதிபடுத்தி இஸ்லாமை தனது உடல் உருப்புகளால் செயல்படுத்துவார்களோ அவர்களுக்குத்தான் கிடைக்கும்.

அல்லாஹ் கூறுகிறான், உங்களில் எவர் ஈமான் கொண்டு (ஸாலிஹான) நற்செயல்கள் புரிகிறார்களோ அவர்களை, அவர்களுக்கு முன்னிருந்தோரை ஆட்சியாளர்களாக்கியது போல், நிச்சயமாக ஆட்சியாளர்களாக்கி வைப்பதாகவும், இன்னும் அவன் அவர்களுக்காக பொருந்திக் கொண்ட மார்க்கத்தில் அவர்களை நிச்சயமாக நிலைப்படுத்துவதாகவும், அவர்களுடைய அச்சத்தைத் திட்டமாக அமைதியைக் கொண்டு மாற்றி விடுவதாகவும், அல்லாஹ் வாக்களித்திருக்கிறான்; "அவர்கள் என்னோடு (எதையும், எவரையும்) இணைவைக்காது, அவர்கள் என்னையே வணங்குவார்கள்;" இதன் பின்னர் (உங்களில்) எவர் மாறு செய்(து நிராகரிக்)கிறாரோ அவர்கள் பாவிகள்தாம். (அல்குர்ஆன் 24:55)

இமாம் இப்னு கஸீர் அவர்கள் கூறினார்கள்
இது அல்லாஹ்வின் புறத்திலிருந்து அல்லாஹ்வின் தூதருக்கு வழங்கிய வாக்குறுதியாகும் அவரது சமுதாயத்தை ஆட்சியாளர்களாக ஆக்குவான் அதாவது மக்களுக்கான தலைவர்களாகவும் அவர்களது பொறுப்பாளிகளாகவும் ஆக்குவான் அவர்கள் மூலம் நாடு நலம்பெறும்,மனிதர்கள் அவர்களுக்கு கட்டுப்படுவார்கள் இன்னும்அவர்களின் அச்சநிலையைப்போக்கி அமைதியையும் ஆட்சியையும் ஏற்படுத்துவான் இந்த வாக்குறுதியை அல்லாஹ் நிறைவேற்றினான் அல்லாஹ்வின் தூதர் மரணிப்பதற்கு முன்னரே மக்காவையும்,கைபரையும்,பஹ்ரைனையும் இன்னும் அரேபிய தீபகற்பத்தையும் யெமனின் முழுவதுமாகவும்வெற்றிகொண்டார்கள் மேலும் ஹஜரின் மஜூஸிகளிடமும்,ஷாமின் பல பகுதிகளீருந்தும் ஜிஸ்யாவை கைபற்றினார்கள் இன்னும் ரோமின் அரசரான ஹிர்கல்,மிஸ்ரின் அரசரான மகூகூஸ் இன்னும் நஜாஷி மன்னர் ஆகியோர்களுக்கு அல்லாஹ்வின் தூதர் அவர்கள் நேர்வழியைக் காட்டினார்கள் .அல்லாஹ்வின் தூதர் மரணித்த பின்னர் அவரது கலீஃபாவான அபூபகர் அவர்கள் இப்பொறுப்புகளை நிறைவேற்றினார்கள்.தஃப்ஸீர் இப்னு கஸீர்

அல்லாஹ்வின் உதவியைப்பெறுவதற்குரிய வழிகள்

1.ஈமானும் நற்செயலும்
அல்லாஹ் கூறுகிறான், "உங்களில் எவர் ஈமான் கொண்டு (ஸாலிஹான) நற்செயல்கள் புரிகிறார்களோ அவர்களை, அவர்களுக்கு முன்னிருந்தோரைஆட்சியாளர்களாக்கியது போல், நிச்சயமாக ஆட்சியாளர்களாக்கி வைப்பதாகவும், இன்னும் அவன் அவர்களுக்காக பொருந்திக் கொண்ட மார்க்கத்தில் அவர்களை நிச்சயமாக நிலைப்படுத்துவதாகவும், அவர்களுடைய அச்சத்தைத் திட்டமாக அமைதியைக் கொண்டு மாற்றி விடுவதாகவும், அல்லாஹ் வாக்களித்திருக்கிறான்; "அவர்கள் என்னோடு (எதையும், எவரையும்) இணைவைக்காது, அவர்கள் என்னையே வணங்குவார்கள்;" இதன் பின்னர் (உங்களில்) எவர் மாறு செய்(து நிராகரிக்)கிறாரோ அவர்கள் பாவிகள்தாம்." (அல்குர்ஆன் 24:55)

2.அல்லாஹ்வின் மார்க்கத்திற்கு உதவி செய்வது.
ஈமான் கொண்டவர்களே! நீங்கள் அல்லாஹ்வுக்கு உதவி செய்தால், அவன் உங்களுக்கு உதவி செய்து உங்கள் பாதங்களையும் உறுதியாக்கி வைப்பான். அன்றியும், எவர்கள் நிராகரிக்கின்றார்களோ, அவர்களுக்குக் கேடுதான்; அவர்களுடைய செயல்களை அவன் பயனற்றவையாகவும் ஆக்கிவிடுவான். (அல்குர்ஆன் 47:7,8)

3.அல்லாஹ்வின் மீது தவக்குல் வைத்தல் அத்துடன் முயற்சியும் வேண்டும்
சகல காரியங்களிலும் அவர்களுடன் கலந்தாலோசனை செய்யும்; பின்னர் (அவை பற்றி) நீர் முடிவு செய்து விட்டால் அல்லாஹ்வின் மீதே பொறுப்பேற்படுத்துவீராக! நிச்சயமாக அல்லாஹ் தன் மீது பொறுப்பேற்படுத்துவோரை நேசிக்கின்றான். (அல்குர்ஆன் 3:159)

4.பொறுப்பு சுமத்தப்பட்டவர்கள் தங்களுக்கு மத்தியில் கலந்தாலோசனை செய்வது.
பரிபூராண அறிவும் சரியான தீர்வும் தன்னிடமிருந்தும் அல்லாஹ்வின் தூதர் அவர்கள் அல்லாஹ்வின் கட்டளைக்கிணங்க தம்முடைய தோழர்களோடு ஆலோசனை செய்யக்கூடியவர்களாக இருந்தார்கள்.

அல்லாஹ் கூறுகிறான், அன்றியும் தம் காரியங்களைத் தம்மிடையே கலந்தாலோசித்துக் கொள்வர். (அல்குர்ஆன் 42:38)

5.எதிரிகளைச் சந்திக்கும் போது நிலைகுலையாமல் உறுதியாக இருப்பது.
மக்களே எதிரிகளைச் சந்திக்க வேண்டுமென்று ஆசைப்படாதீர்கள். அல்லாஹ்விடம் (போரைத் தவிர்க்க வாய்ப்பளித்து) அமைதி நிலை தரும்படி கேளுங்கள். (அதையும் மீறி) எதிரிகளை (போர்க்களத்தில்) சந்திக்க நேரிட்டால் நிலைகுலைந்து விடாமல் போரின் துன்பங்களைச் சகித்துக் கொண்டு பொறுமையாயிருங்கள். மேலும், சொர்க்கம் வாட்களின் நிழல்களில் இருக்கிறது என்பதை அறிந்து கொள்ளுங்கள்' என்று கூறிவிட்டு, 'இறைவா! வேதத்தை அருள்பவனே! மேகத்தை நகர்த்திச் செல்பவனே! படைகளைத் தோற்கடிப்பவனே! இ(ப்பகை)வர்களைத் தோற்கடித்து இவர்களுக்கெதிராக எங்களுக்கு உதவுவாயாக!' என்று பிரார்த்தித்தார்கள். ஸஹீஹுல் புஹாரி 2966

6.வீரமும் அற்பணிப்பும்.
அல்லாஹ்வின் உதவி வேண்டுமென்றால் அதற்கு நாம் அர்ப்பணிப்பையும் வீரத்தையும் வெளிப்படுத்த வேண்டும் நம்பிக்கையாளர்களைப்பொறுத்த வரை மரணத்தைக் கண்டு அஞ்சமாட்டார்கள். ஏனெனில் இவ்வுலகில் நாம் மரணிக்கத்தான் வந்துள்ளோம் மரணம் நம்மை எங்கிருந்தாலும் வந்தே தீரும்
"நீங்கள் எங்கிருந்தபோதிலும் உங்களை மரணம் அடைந்தே தீரும்; நீங்கள் மிகவும் உறுதியாகக் கட்டப்பட்ட கோட்டைகளில் இருந்த போதிலும் சரியே! (அல்குர்ஆன் 4:78)

7. துவாவும் திக்ரும்
அல்லாஹ்வின் உதவியைப்பெற நம்பிக்கையாளர்களுக்கு ஆகச்சிறந்த வழி அவனிடம் மன்றாடுவது தான் ஏனெனில் அல்லாஹ் மட்டும் தான் வெற்றி தோல்வியைத் தீர்மானிப்பவன் அவன் நாடினால் மட்டும் தான் நமது முயற்சிகளும் வெற்றியாகும்.
(நபியே!) என் அடியார்கள் என்னைப்பற்றி உம்மிடம் கேட்டால்; "நிச்சயமாக நான் சமீபமாகவே இருக்கிறேன், பிரார்த்தனை செய்பவரின் பிரார்த்தனைக்கு அவர் பிரார்த்தித்தால் விடையளிக்கிறேன்; அவர்கள் என்னிடமே(பிரார்த்தித்துக்) கேட்கட்டும்; என்னையே நம்பட்டும். அப்பொழுது அவர்கள் நேர்வழியை அடைவார்கள்" என்று கூறுவீராக.2:186

8.அல்லாஹ்விற்கும் அவனது தூதருக்கும் கட்டுப்படுவது
இன்னும் எவர்கள் அல்லாஹ்வுக்கும் அவனுடைய தூதருக்கும் கீழ்படிந்து அல்லாஹ்வுக்கு பயபக்தி கொள்கிறார்களோ அவர்கள் தாம் வெற்றி பெற்றவர்கள். (அல்குர்ஆன் 24:52)

9.ஒற்றுமையும் முரண்பாடின்மையும்
அன்றியும் நீங்கள் அல்லாஹ்வுக்கும், அவனுடைய தூதருக்கும் கீழ்ப்படிந்து நடங்கள், மேலும், உங்களுக்குள் பிணங்கிக் கொள்ளாதீர்கள், அவ்வாறாயின் நீங்கள் தைரியத்தை இழந்துவிடுவீர்கள், மேலும், உங்கள் வலிமை குன்றிவிடும், ஆகவே, நீங்கள் (துன்பங்களைச் சகித்துக் கொண்டு) பொறுமையாக இருங்கள், நிச்சயமாக அல்லாஹ் பொறுமையுடையோர்களுடன் இருக்கின்றான். (அல்குர்ஆன் 8:46)

10.பொறுமை
முஃமின்களே! பொறுமையுடன் இருங்கள்; (இன்னல்களை) சகித்துக் கொள்ளுங்கள்; (ஒருவரை ஒருவர்) பலப்படுத்திக் கொள்ளுங்கள்; அல்லாஹ்வுக்கு அஞ்சிக் கொள்ளுங்கள்; (இம்மையிலும், மறுமையிலும்) நீங்கள் வெற்றியடைவீர்கள்! (அல்குர்ஆன் 3:200)

11.உளத்தூய்மை
பெருமைக்காகவும், மனிதர்களுக்குக் காண்பிப்பதற்காகவும் தங்கள் வீடுகளிலிருந்து வெளிக்கிளம்பி (முஸ்லிம்களுக்கெதிராக பத்ரில்) மக்களை அல்லாஹ்வுடைய பாதையை விட்டுத் தடுத்தார்களே அவர்களைப் போன்று நீங்கள் ஆகிவிடாதீர்கள் அவர்கள் செய்வதை அல்லாஹ் சூழ்ந்து அறிந்தவனாக இருக்கிறான். (அல்குர்ஆன் 8:47)

நம்பிக்கையில்லாமல் நற்செயல்கள் இல்லாமல் அல்லாஹ்வின் உதவி கிடைக்குமா? அல்லாஹ்வின் மார்க்கத்திற்கு உதவி செய்யாமல் அல்லாஹ்வின் மீது தவக்குல் வைக்காமல் அல்லாஹ்வின் உதவியை எதிர்பார்க்கலாமா?

அல்லாஹ்வின் கட்டளைகளை புறக்கணித்து அல்லாஹ்வின் உதவியை பெற முடியுமா? அல்லாஹ்வின் உதவி முஃமின்களுக்குத்தான் என்றிருக்கும் போது அல்லாஹ்விற்கும் அவனது தூதருக்கும் கட்டுப்பட்டு நடக்காமல் ஒருவர் முஃமினாக இருக்க முடியுமா? இன்னும் பொறுமையாளர்களுடன் அல்லாஹ் இருக்கிறான் என்றும் சோதனை கட்டங்களில் பொறுமைக்காக்க வேண்டுமென்றும் அல்லாஹ் கூறியிருக்க அதை கடைபிடிக்காமல் இருந்தால் அல்லாஹ்வின் உதவி கிடைக்குமா? இவை எல்லாவற்றிற்கும் மேலாக அல்லாஹ்விடம் கை ஏந்தாமல், அவனிடம் மனம் உருகி பிரார்த்திக்காமல் அல்லாஹ்வின் உதவி வருமா?

எனவே முஃமின்களே அல்லாஹ் நம் மீது சுமத்திய கட்டளைகளை நிறைவேற்றவோம், அல்லாஹ் வாக்களித்த அவனின்

உதவியை எதிர்பார்ப்போம். இன் ஷா அல்லாஹ்.

http://www.islamkalvi.com/?p=124080


--
இது என் இறைவனின் அருட்கொடையிளிருந்து அருளப்பட்டது
www.sahabudeen.com

ஞாயிறு, 6 ஜூன், 2021

முஸ்லிம்களும்சோதனைகளும்

மனிதர்களை சோதனைக்கு ஆளாக்குவது என்பது அல்லாஹுவின் நியதியாகும். அவர்களில் மூஃமின்கள் யார்? முனாஃபிகுகள் யார்? உண்மையாளர்கள் யார்? பொய்யர்கள் யார்? என்பதையெல்லாம் பிரித்தறிய மனிதர்களுக்கு அல்லாஹ் சோதனைகளை ஏற்படுத்துகிறான்.

அல்லாஹ் கூறுகிறான், "நிச்சயமாக அவர்களுக்கு முன்னிருந்தார்களே அவர்களையும் நாம் சோதித்திருக்கின்றோம் ஆகவே உண்மையுரைப்பவர்களை நிச்சயமாக அல்லாஹ் அறிவான்; இன்னும் பொய்யர்களையும் அவன் நிச்சயமாக அறிவான். (அல்குர்ஆன் 29:2,3)

அல்லாஹுவையும் மறுமை நாளையும் நம்பிக்கைக்கொண்டோம் என அனைவராலும் வாதிடமுடியும். ஆனாலும் அந்த நம்பிக்கையில் அவர்கள் உண்மையாளர்களாக இருக்கிறார்களா இல்லையா என்பது சோதனையின் மூலம் தான் உறுதி செய்யமுடியும்.

அல்லாஹ் கூறுகிறான், (காஃபிர்களே!) தீயவர்களை நல்லவர்களைவிட்டும் பிரித்தறிவிக்கும் வரையில் முஃமின்களை நீங்கள் இருக்கும் நிலையில் அல்லாஹ் விட்டு வைக்க (நாட)வில்லை; இன்னும், அல்லாஹ் உங்களுக்கு மறைவானவற்றை அறிவித்துவைப்பவனாகவும் இல்லை; ஏனெனில் (இவ்வாறு அறிவிப்பதற்கு) அல்லாஹ் தான் நாடியவரைத் தன் தூதர்களிலிருந்து தேர்ந்தெடுக்கிறான். ஆகவே அல்லாஹ்வின் மீதும், அவன் தூதர்கள் மீதும் ஈமான் கொள்ளுங்கள்; நீங்கள் நம்பிக்கை கொண்டு பயபக்தியுடன் நடப்பீர்களாயின் உங்களுக்கு மகத்தான நற்கூலியுண்டு. (அல்குர்ஆன் 3:179)

சோதனை என்பது குறிப்பிட்ட காலத்தவருக்கு மட்டுமல்ல மாறாக எல்லா காலத்தவரையும் அல்லாஹ் சோதித்துள்ளான்
சோதனைகளை எதிர்கொள்வதில் மனிதர்கள் மூன்று தரப்பினர்களாக உள்ளனர்.

ஒன்று: நன்மைகளை இழந்தவர்கள் இவர்கள் வெறுப்புடனும், அல்லாஹுவைக்குறித்த தவறான எண்ணத்தோடும், இன்னும் விதியை குறைகூறியவர்களாகவும் சோதனைகளை எதிர்கொள்ளக்கூடியவர்கள்.

இரண்டு: அல்லாஹ்வின் அருளுக்குரியவர்கள் பொறுமையோடும் அல்லாஹுவைக்குறித்த நல்லெண்ணத்தோடும் சோதனைகளை எதிர்கொள்ளக்கூடியவர்கள்.

மூன்று: பொருந்திக்கொள்ளக்கூடியவர் சோதனையை பொருத்தத்தோடும், நன்றியுணர்வோடும் எதிர்கொள்ளக்கூடியவர்கள். இது பொறுமை என்பதை விட ஒருபடி மேலாகும்.

அல்லாஹ்வின் தூதர் (ஸல்) அவர்கள் கூறினார்கள்:
நம்பிக்கையாளரின் நிலையைக்கண்டு நான் வியப்படைகிறேன். அவரது (வாழ்வின்) அனைத்து அம்சங்களும் (அவருக்கு) நன்மையாகவே அமையும். நம்பிக்கையாளருக்கு அல்லாமல் வேறெவருக்கும் இந்தப் பாக்கியமானது அமைவதில்லை. அவருக்கு ஏதேனும் மகிழ்ச்சி ஏற்பட்டால், அவர் நன்றி செலுத்துகிறார். அது அவருக்கு நன்மையாக அமைகிறது. அவருக்கு ஏதேனும் துயரம் நேர்ந்தால், அவர் பொறுமை காக்கிறார். அதுவும் அவருக்கு நன்மையாக அமைந்துவிடுகிறது.
இதை ஸுஹைப் (ரலி) அவர்கள் அறிவிக்கிறார்கள் நூல்:ஸஹீஹ் முஸ்லிம்.5726

முஃமினைப் பொறுத்தவரை அல்லாஹ் அவனது பாவத்திற்கான தண்டனையை உலகிலேயே விரைவாக வழங்கி மறுமையில் அவனது அந்தஸ்துகளை உயர்த்துகிறான் அதே நேரத்தில் காஃபிரையும், முனாஃபிக்கையும் உலகில் சோதனைகளின்றி வாழவைத்து மறுமையில் அவர்களுக்கு தண்டனையை வழங்க இருக்கிறான்

அல்லாஹ்வின் தூதர் (ஸல்) அவர்கள் கூறினார்கள்:
இறைநம்பிக்கையாளரின் நிலை, காற்றில் அசையும் இளம் தளிர்ப் பயிருக்கு ஒப்பானதாகும். அது முற்றிய பயிராகும்வரை அதைக் காற்று ஒரு முறை சாய்த்து, மறுமுறை நிமிர்ந்து நிற்கச் செய்யும். இறைமறுப்பாளனின் நிலை, தனது அடித்தண்டின் மீது விறைப்பாக நிமிர்ந்து நிற்கும் தேவதாரு மரத்திற்கு ஒப்பானதாகும். அது ஒரேடியாக வேரோடு சாய்ந்து விழும்வரை அதை எதுவும் சாய்ப்பதில்லை.
அறிவிப்பாளர் கஅப் பின் மாலிக் (ரலி) அவர்கள்.ஸஹீஹ் முஸ்லிம் 5411

நிச்சயமாக நாம் உங்களை ஓரளவு அச்சத்தாலும், பசியாலும், பொருள்கள், உயிர்கள், விளைச்சல்கள் ஆகியவற்றின் இழப்பினாலும் சோதிப்போம்; ஆனால் பொறுமையுடையோருக்கு (நபியே!) நீர் நன்மாராயங் கூறுவீராக! அவர்கள் எத்தகையோரென்றால், தங்களுக்கு ஏதேனும் ஒரு துன்பம் பீடித்தால் "நிச்சயமாக நாம் அல்லாஹ்வுக்காகவே இருக்கின்றோம், நிச்சயமாக நாம் அவன் பக்கமே திரும்பிச் செல்பவர்களாக இருக்கிறோம்" என்று கூறுவார்கள். இத்தகையோர் மீது தான் அவர்களுடைய இறைவனின் நல்லாசியும், நற்கிருபையும் உண்டாகின்றன, இன்னும் இவர்கள் தாம் நேர் வழியை அடைந்தவர்கள். (அல்குர்ஆன் 2:155,156,157)

சோதனையின் வடிவங்கள்
மார்க்கத்தில் சோதனை
செல்வத்தில் சோதனை
பிள்ளைகள் விஷயத்தில் சோதனை
இன்னும் இதுவல்லாத பலதரப்பட்ட சோதனைகளும் உள்ளன

நிச்சயமாக நாம் உங்களை அச்சத்தாலும், பசியாலும், பொருள்கள், உயிர்கள், விளைச்சல்கள் ஆகியவற்றின் இழப்பினாலும் சோதிப்போம்; இந்த நிலைகளில் பொறுமையை மேற்கொள்கின்றவர்களுக்கு (நபியே!) நீர் நற்செய்தி கூறுவீராக. (அல்குர்ஆன் 2:155)

இதில் மிகப்பெரிய சோதனை மார்க்கத்தில் ஏற்படும் சோதனையாகும்

அல்லாஹ்வின் தூதர்களும் பல்வேறுவிதமான சோதனைகளுக்கு ஆளானார்கள் அந்த சோதனைகளையெல்லாம் அவர்கள் பொறுமையாக எதிர்கொண்டு அல்லாஹ்வின் பொறுத்தத்தை தேடினார்கள் முஃமிகளும் அவர்களையே முன்மாதிரியாகக்கொண்டு சோதனைகளை சாதனையாக மாற்ற முயற்சிக்கவேண்டும்.
சோதனைகள் ஏற்படும்போது அதை ஒரு முஸ்லிம் எப்படி எதிர்கொள்ளவேண்டும்

1.இச்சோதனை அல்லாஹ்வின் புறத்தில் இருந்துள்ளது என்று உறுதிகொண்டு பொறுப்பை அல்லாஹ்விடம் ஒப்படைக்க வேண்டும்.
2. அல்லாஹ்வின் கட்டளைக்கு மாறு செய்யாமலும், வெறுக்காமலும், காலத்தை ஏசாமலும் மார்க்கத்தை உறுதியாக பற்றிப்பிடித்து இருக்கவேண்டும்.
3.சோதனைகளை தடுப்பதற்கான பயனுள்ள காரியங்களில் ஈடுபடவேண்டும்.
4.செய்த பாவங்களுக்காக அல்லாஹ்வின் பக்கம் மீண்டு பாவமன்னிப்புத்தேடவேண்டும்.

சோதனையின் பயன்கள்

  • பாவங்கள் மன்னிக்கப்படும் தீமைகள் அழிந்துபோகும்.
  • மறுமையில் அந்தஸ்தும் படித்தரமும் உயரும்.
  • அல்லாஹ்வின் முன் பணிவதற்கும் தவ்பா தேடுவதற்குமான வாசலை திறக்கும்.
  • அல்லாஹ்வுடனான அடியானின் தொடர்பை வலுப்படுத்தும்.
  • நன்மையை இழந்த துர்பாக்கிய சாலிகளின் வலிகளை உணர்த்துகிறது.
  • விதியின் மீதுள்ள நம்பிக்கையை உறுதிபடுத்தும் எந்த நன்மையும் தீமையும் அல்லாஹுவைகொண்டல்லாமல் வேறில்லை என்ற உறுதியைத்தருகிறது.

சோதனைகளில் அகப்பட்டவர்கள் மீள்வதற்கான வழிகள்
1.பிரார்த்தனை ஈடுபடுவது
ஷைகுல் இஸ்லாம் இப்னுதைமியா (ரஹ்) அவர்கள் கூறினார்கள் பிரார்த்தனை சோதனைகளை தடுக்கும் காரணிகளாகும். ஒருவரது பிரார்த்தனை வலுவானதாக இருந்தால் அது சோதனையைத் தடுக்கும். சோதனையின் காரணம் வலுவானதாக இருந்தால் பிரார்த்தனை அதனை தடுக்காது. என்றாலும் அச்சோதனையை குறைக்கவோ பலவீனமாக்கவோ செய்யும். எனவே தான் கிரஹணங்களின் போதும் ஆபத்துகளின் போதும் தொழவேண்டும், துவா செய்யவேண்டும், பாவமன்னிப்புக் கோரவேண்டுமென்றும் ஏவப்பட்டுள்ளது.

2.தொழுகையைப்பேணுவது
நபி அவர்கள் எதாவது சோதனை ஏற்பட்டால் தொழுவார்கள் நுல்:சுனன் அபீதாவூத் 1319
நம்பிக்கை கொண்டோரே! பொறுமையுடனும், தொழுகையுடனும் உதவி தேடுங்கள்; நிச்சயமாக அல்லாஹ் பொறுமையுடையவர்களுடன் இருக்கிறான்2:153

3.குர்ஆனை அதிகமதிகம் ஓதுவது

இன்னும், நாம் முஃமின்களுக்கு ரஹ்மத்தாகவும், அருமருந்தாகவும் உள்ளவற்றையே குர்ஆனில் நாம் இறக்கியிருக்கிறோம்; ஆனால்

அக்கிரமக்காரர்களுக்கோ இழப்பைத் தவிர வேறெதையும் (இது) அதிகமாக்குவதில்லை. (அல்குர்ஆன் 17:82)

எத்தகைய சோதனைகளை நாம் எதிர்கொள்ள நேர்ந்தாலும், ஈமானை இழக்காமல் இறுதி வரை பொறுமையோடு இருந்து வெற்றிபெறக்கூடிய பாக்கியத்தை அடைய மேற்கூறிய வழிகளை பின்பற்றி வாழ்வோமாக ஆமீன்

http://www.islamkalvi.com/?p=124083


--
இது என் இறைவனின் அருட்கொடையிளிருந்து அருளப்பட்டது
www.sahabudeen.com

நவீனக்கொள்கைக் குழப்பங்களிலிருந்து எமது ஈமானைப் பாதுகாத்துக் கொள்வோம்

ஷைய்க் இன்திகாப் உமரீ   அஸ்ஸலாமு அலைக்கும் வரஹ்மதுல்லாஹி வபரகாதுஹூ.. அன்பார்ந்த சகோதரர்களே..! அல்லாஹ்வால் இறுதித் தூதராக இந்...

Popular Posts