வாகனத்தில் எரிபொருள் சேமிக்க...!

பெட்ரோல் விலையுயர்வு: செலவைக் குறைக்க சிக்கன வழிகள்!
வருமானம் உயர்கிறதோ இல்லையோ, பெட்ரோல், டீசல் விலை உயர்வு என்பது அடிக்கடி நடக்கும் விஷயமாகி விட்டது. சென்ற வருடத்தில் 11 மாத காலத்தில் 11 முறை, சராசரியாக மாதத்துக்கு ஒருமுறை பெட்ரோல், டீசல் விலை உயர்த்தப்பட்டு இருக்கிறது. மொத்தமாக ஒரு லிட்டருக்கு 15 ரூபாய் வரை விலை உயர்ந்திருக்கிறது.

அதாவது பெட்ரோலின் விலை கடந்த ஒரு வருடத்தில் சுமார் 28% அதிகரித்துள்ளது. இந்த விலை உயர்விலிருந்து பாதிப் படையாமல் இருக்க இரண்டே வழிகள்தான் உண்டு. ஒன்று, இரண்டு சக்கர, நான்கு சக்கர வண்டிகளைப் பயன்படுத்தாமல் இருப்பது. இரண்டாவது, சிக்கன மாக பயன்படுத்துவது. முதல் வழி, இப்போதைக்கு சாத்தியமில்லை. ஆனால், இரண்டாவது வழியை நிச்சயம் பின்பற்ற முடியும். கார் மற்றும் இருசக்கர வாகனங்களுக்கு என்ன செய்தால் பெட்ரோலின் பயன்பாட்டைக் குறைக்கலாம் என 'பெட்ரோலியம் கன்சர்வேஷன் ரிசர்ச் அசோசியேஷனி’ல் இருக்கும் அதிகாரிகள் நமக்காக கொடுத்த டிப்ஸ்:

டயர் பராமரிப்பு :

டயர்களின் காற்றழுத்தத்தை வாரத்துக்கு ஒருமுறையாவது செக் செய்ய வேண்டும். காற்றில் என்ன இருக்கிறது என்று அஜாக்கிரதையாக இருக்க வேண்டாம். காற்றின் அழுத்தத் துக்கும் வண்டியின் வேகத்துக்கும் தொடர்பு இருக்கிறது. அழுத்தம் குறைவாக இருந்தால் வண்டி குறைவான வேகத்தில் செல்லும். அதனால், எரிபொருள் அதிக மாகவே செலவாகும். டயர்கள் தேய்ந்து போயிருந்தால் உடன டியாக மாற்றவும். தேய்ந்த டயர் களைக் கொண்டு வண்டியை வேகமாக ஓட்ட முடியாது. சரியாக பிரேக்கும் பிடிக்காது.

சிக்னலில் சிக்கனம்:

சில நிமிடங்களாவது காத்திருக்க வேண்டிய சிக்னல்களில் என்ஜினை ஆஃப் செய்து விட்டால் தேவையில் லாமல் எரிபொருள் வீணாகாது. பச்சை விளக்கு எரிவதற்கு பத்து வினாடிகளுக்கு முன்பு மீண்டும் என்ஜினை ஆன் செய்யலாம். இரவில் சிக்னலில் நிற்கும்போது முன்புற விளக்குகளை அணைப் பதால்கூட எரிபொருள் மிச்சமாகும்.

ஏர்கன்டிஷன் :

கார்களில் பிரயாணம் செய்யும் போது ஏ.சி-யை பயன்படுத்துவதற்கு 8% எரிபொருள் தேவைப்படுகிறது. இதனால் தேவைப்படும்போது மட்டும் பயன்படுத்தலாம். அதிக டிராஃபிக் உள்ள சாலையில் ஏ.சி-யைப் பயன்படுத்தாமல் இருப்பது நல்லது. பிற வாகனங்களிலிருந்து வெளிவரும் வெப்பத்தினால், நமது வாகன ஏ.சி-யின் வேலையும் அதிகரிக்கும். இதனால் எரிபொருளின் தேவையும் அதிகமாகும். முக்கியமாக கார் கண்ணாடிகளை முழுவதுமாக மூடவும். நன்றாக கூல் ஆகிவிட்டால் ஆஃப் செய்து கொள்ளலாம். ஏற்கெனவே இருக்கும் குளிர்ச்சியை வைத்தே கொஞ்ச நேரம் தாக்குப் பிடிக்கலாம்.

வேகம் :

வாகனங்களில் உள்ள ஒவ்வொரு கியருக்கும் ஒரு வேகம் இருக்கிறது. சிலர் டாப் கியரில் மெதுவாகவும், இரண்டாவது கியரில் வேகமாகவும் செல்வார்கள். எந்த வாகனமாக இருந்தாலும் டாப் கியரில் என்ஜின் முழுமையான திறனில் இயங்கும்., எரிபொருளும் வீணாகாது. 'எக்கனாமிக் ஸ்பீட்’ லிமிட்டை கடைப்பிடிப்பது நல்லது.

தேவை என்ன?

சிலர் மாதத்துக்கு ஒருமுறை மட்டுமே காரை பயன்படுத்து வார்கள். ஆனால் அவர்களின் பெட்ரோல் டாங்க் எப்போதும் நிறைந்தே இருக்கும். ஒரு ஐந்து லிட்டர் தீர்ந்துவிட்டால் உடனே போய் டேங்கை ஃபில் பண்ணிக் கொண்டு வந்து ஷெட்டில் நிறுத்தி விடுவார்கள். இது தேவையில்லாதது. அப்படி நீண்ட நாளைக்கு பயன்படுத்தாமல் வைத்திருக்கும் பெட்ரோல் அல்லது டீசலின் தரமானது குறைந்து விடும். இதனால் வண்டியின் வேகம் அதனுடைய முழுத்திறனில் இயங்காது.

ஓவர் லோடு :

தேவையில்லாமல் கார்களில் லோடு ஏற்ற வேண்டாம். உங்கள் காரில் 50 கிலோ எடை கூடினால் 2% பெட்ரோல் அதிகமாக தேவைப்படும். பெட்ரோல் டேங்கை ஃபில் செய்தபடியே வண்டி ஓட்டுவதும் ஓவர் லோடுதான். இதனால் கூட எரிபொருள் தேவை அதிகரிக்கிறது. எனவே, பாதி அளவு நிரப்பப்பட்ட பெட்ரோல் டேங்குடன் வண்டி ஓட்டுவது நல்லது.

முக்கியமானவை இன்னும் உண்டு.

1. விடிய வாகனத்தை (மோட்டர் குளிர் நிலையில் இருக்கும் போது) ஸ்டார்ட செய்து ஓடும் போது, முதல் சில கிலோமீற்றர்களுக்கு மெதுவாக ஓட்ட வேண்டும். (20 வீதத்திற்கு அதிகமான எரிபொருள் வீணாகும் இந்த நிலையில்)

2. கண்ணாடிகளை இறக்கி விட்டு ஓட்டுவது, அதிலும் 50 மீற்றருக்கு அதிகமான வேகத்தில் செல்லும் போது 20 வீதத்திற்கு அதிகம் வீணாகின்ரது.

3. 1,2,3 கியர்களில் வண்டியை தேவையில்லாமல் அளவுக்கு அதிகமாக "ரேஸ்" பன்னுவதும் கூடாது.

தேவையற்ற பொருட்களை வாங்கிக் குவிக்கும் விபரீத ஆசை! – Part 1

எழுதியவர்/பதிந்தவர்/உரை:சகோதரர் அபூ ரிஸ்வான் 

இக்கால நாகரீக உலகில் மனிதனுக்கு வேண்டிய வாழ்க்கை வசதிகளும், உபயோகிக்கும் பொருள்களும் ஏராளமாகப் பெருகியிருக்கின்றன. விதவிதமான ஆயத்த ஆடைகள், (Ready mades); கலைநயம் மிக்க சேலைகள்! கண்கவரும் ஆபரணங்கள்! கவர்ச்சிகரமான அலங்காரப் பொருட்கள், பலவகையான வீட்டு உபயோக சாதனங்கள், பெண்களின் அழகை மெருகூட்டும் பொருட்கள்! இன்னும் விதவிதமான வாகனங்கள், இருசக்கர ஊர்திகள், கணிணி வகைகள், புதிது புதிதாக விற்பனைக்கு வரும் அலைபேசிகள்! ஆக இப்படி லட்சக்கணக்கான பொருட்களை மக்கள் பெரும் சூப்பர் மார்க்கெட்டுகளிலும், பெரும் கடைகளிலும் மற்றும் சிறிய கடைகளிலும் தினந்தோரும் வாங்கிச் செல்கிறார்கள்.

இப்படி குவித்தும், அடுக்கியும், ஷோ கேஸ்களில் அலங்கரித்தும் வைக்கப்பட்டுள்ள பொருள்களில் மக்கள் வாழ்க்கைக்கு அத்தியாவசியமாக தேவைப்படுபனவற்றையும், அவசியமானவற்றையும்தான் வாங்குகிறார்களா? என்றால் நிச்சயமாக இல்லை என்கிறார்கள் மனோதத்துவ நிபுணர்கள். அமெரிக்காவில் 20 பேரில் ஒருவர் என்ற விகிதத்தில் ஆண்களும் சரி பெண்களும் சரி தேவையில்லாமலேயே எண்ணற்ற பொருட்களை வாங்கிக் குவிக்கும் மனோநிலையை உடையவர்களாக இருக்கிறார்கள். இன்னுமொரு புள்ளிவிவரப்படி அமெரிக்காவில் 17 மில்லியன் நபர்கள் இப்படிப்பட்ட பொருட்களை தேவையின்றி வாங்கிக் குவிக்கும் கட்டுப்பாடற்ற மனோயிச்சையால் துன்பமும் அவதியும் படுகிறார்கள். இம்மனநிலையை ‘வாங்கிக் குவிக்கும் மனஅழுத்த சீர்கேடு’ (compulsive shoping disorder) என்றும், ‘பொருள் வாங்குதலில் தேட்டமுடையவன்’ (shopaholic) என்றும் அழைக்கிறார்கள்.

‘Shopaholic’ என்னும் சொல் ‘alcoholic’ என்ற ஆங்கில சொல்லின் பொருள்படும் ‘நிறுத்தாத குடிகாரன்’ மற்றும்  ‘workaholic’ என்ற ஆங்கிலச் சொல்லின் பொருள் கொண்ட ‘இடைவிடாது பணிசெய்து கொண்டிருப்பவன்’ என்பது போன்றவையே! இப்படிப்பட்ட மனக்கட்டுப்பாடற்ற நிலை மக்களுக்கு எவ்வாறு ஏற்படுகின்றது என்பதை ஆராய்வோமானால் அதற்குப் பல காரணங்களைக் கூறமுடியும்.

முதலாவது காரணம்: மக்கள் உலக இன்பங்களில் மூழ்கி சுவைத்து மறுமை இன்பங்களை மறந்திருக்கிறார்கள். உலக மக்கள் பலமதங்களை பின்பற்றுபவர்களாக இருந்தும் இறைநம்பிக்கையும், மறுமைப்பற்றிய சிந்தனையும், இவ்வுலக வாழ்வு மிகக்குறுகிய, நிலையற்ற வாழ்வு என்னும் உண்ணமையும் மனதில் ஆழப்பதியாததே! அதிலும் இளைஞர்களின் எண்ணங்கள் இன்னும் விபரீதமாய் இருக்கின்றன. “வாழ்க்கை வாழ்வது ஒருமுறையே; அதனால் அவ்வாழ்க்கையில் எல்லாவிதமான இன்பங்களையும், சாதனங்களையும் அனுபவித்து மகிழ வேண்டும்” என்பது தான்.

 இப்படிப்பட்ட மனநிலையிலுள்ள ஆண்களும் சரி, பெண்களும் சரி தங்களுக்கு தேவையான பொருட்களை மற்றுமின்றி தேவையில்லாத பொருட்களையும் வாங்கி வைத்துக் கொள்கிறார்கள். இவர்களில் பொருளாதார வசதியுடையவர்கள் தான் இப்படி ‘ஷாப்பஹாலிக்காக’ (shopaholic) இருக்கிறார்களா என்றால் அவர்கள் மட்டுமல்லாது நடுத்தர வசதியுடையவர்களும் (middle class) இப்படிப்பட்ட மனநிலையால் பாதிக்கப்பட்டிருக்கிறார்கள். முன்பு எடுக்கப்ட்ட புள்ளிவிபரப்படி, 10 ஷாப்பஹாலிக்குகளில் 9 பேர் பெண்களாகவும் ஒருவர் ஆணாகவும் இருந்தார். தற்பொழுது ஆண்களிலும் இம்மனோநிலை கொண்டவர்கள் அதிகரித்திருக்கிறார்கள்.

இரண்டாவது காரணம்: பெருமையடிப்பது. மற்றவர்களிடம் இல்லாத புதுப்புதுவகையான பொருட்கள் தன்னிடம் உள்ளது என்று தனது தோழர்கள் மற்றும் தோழியர்களிடம் காட்டுவது. இதில் பெண்கள் அதிக அளவில் ஈடுபடுகிறார்கள். கடைகளில் ஏதாவது புதிய மாடல் நகை விற்பனைக்கு வந்திருந்தால், பழைய நகைகளை விற்றுவிற்று அப்புதிய மாடல் நகையை உடனே வாங்கி அணிந்து கொள்கிறார்கள். பெருமையோடு தம் உறவினர்களிடமும், தோழிகளிடமும் காட்டுகிறார்கள். இதுபோல் ஒவ்வொரு முறையும் நகைகளை மாற்றும்பொழுது எந்த அளவுக்கு பணம் வீணாக செலவாகிறது என்பதை இப்பெண்கள் உணர்வதில்லை. இம்மனநிலையை ஆய்வுசெய்யும் நிபுணர்கள் இது ஒருவகையான ‘நாகரீகத்தின் மேல்படியில் நிற்பவர்கள் நான்தான் என்று காட்டும் மனநிலை’ என வர்ணிக்கிறார்கள்.

மூன்றாவது காரணம்: பொருட்களை தேவையில்லாமல் ஆசைப்பட்டவற்றையெல்லாம் வாங்கிக்குவிப்பது. ஒரு பெண்ணுக்கு ஒரு வருடத்திற்கு எத்தனை ஆடைகள் தேவைப்படும்? ஒரு நடுத்தர வர்க்கத்தில் உள்ள பெண்ணாயிருந்தால் அவருக்கு 5 முதல் 10 சேலைகள் தேவைப்படலாம். செல்வந்தர்களாக இருந்தால் 10 முதல் 20 சேலைகள் வாங்கி அணியலாம். இவையெல்லாம் மிதமான தேவைகள். ஆனால் தற்காலத்தில் என்ன நடக்கிறது? கேட்டால் ஆச்சரியப்படுவீர்கள்! ஒரு மாப்பிள்ளை வீட்டார் கல்யாணப் பெண்ணுக்கு 100 முதல் 120 புடவைகளும் அதற்கு ஏற்றார்போல் சட்டை துண்டுகளும் வாங்கி ஒரு பெரிய பெட்டியில் (suit case) வைத்து கொடுக்க்க வேண்டுமாம். அதுமட்டுமல்லாமல், ஒருவர் வளைகுடா நாடுகளில் பணிபுரிபவராய் இருந்தால் ஒவ்வொரு தடவையும் தான் தாயகம் திரும்பும்போது தன் மனைவிக்கு 50 முதல் 60 சேலைகள் வரையில் வாங்கிக் கொண்டுபோய் கொடுக்கிறார். இவ்வளவு ஆடைகள் ஒரு பெண்ணிற்கு தேவையானதா? நிச்சயமாக இல்லை!

மேலும் சில பெண்கள் திருமணத்திற்கு அழைப்பின்பால் செல்லும் போது ஒரு புதிய சேலையை அணிந்துக் கொண்டுதான் செல்லவேண்டும்  என்று விரும்புகிறார்கள். ஒரு ஊரில் ஒருவருடத்தில் 25 திருமணங்கள் நடைபெறுவதாக வைத்துக்கொண்டால், ஒவ்வொரு திருமணத்திற்கும் ஒரு புதுப்புடவை வீதம் 25 புடவைகளை வாங்கிக் குவிக்கிறார்கள். பெரும் செல்வந்தர்கள் கூட இப்படிபட்ட வீண்விரயத்தை செய்யக்கூடாது என்று இருக்கும் போது நடுத்தரவர்க்க மக்கள் இப்படிப்பட்ட வீண்விரயத்தை செய்து பொருளாதாரத்தை அழிக்கலாமா? இதை இறைவன் மறுமையில் விசாரிக்க மாட்டான் என்று இப்பெண்கள் நினைத்துக் கொண்டிருக்கிறார்களா?

நான்காவது காரணம்: பெண்களிலும் சரி, ஆண்களிலும் சரி, தனது வீட்டை மற்றவர்களைவிட அலங்கரிக்க வேண்டும் என்ற மனஉந்தல் மிகுதமாய் இருக்கிறது. வீடுகட்டும் பொழுது அவ்வீடு அங்கு குடியிருக்கப்போகும் குடும்பத்தினருக்குப் போதுமான வசதியுடையதாகவும், போதுமான அறைகள் உடையதாகவும் இருக்கவேண்டும் என்பது தான் எல்லோரின் விருப்பமும். ஆனால் வீட்டின் உட்புறம் செய்யக்கூடிய வசதியைவிட வீட்டிற்கு வெளிப்புறமும் முகப்பிலும் பெரும்  அலங்காரங்களை செய்தும், தூண்களை கட்டியும், மேலும் மார்பில் (marble) போன்ற சலவைக்கற்களை சுவரெங்கும் பதித்தும் அலங்காரம் செய்வது வீண்விரயமாய் ஆகாதா? அதிலும் முஸ்லிம் அல்லாதவர்களின் வீடுகளைவிட முஸ்லிம்களின் வீடுகள் வீண் அலங்காரங்களின் உறைவிடமாக காட்சி அளிக்கின்றன.

 எனக்குத் தெரிந்த ஒருவர் – என்னுடன் சிறுவயதில் ஒன்றாகப் பள்ளியில் படித்தவர் – ஒரு மிகப்பெரிய அலங்காரமான வீட்டைக் கட்டியிருக்கிறார். ஆனால் ஏற்கனவே அவருடைய தகப்பனார் கற்கோட்டையைப் போன்ற ஒரு பெரிய வீட்டை கட்டிவைத்துவிட்டுத் தான் மரணம் அடைந்தார். மகனுக்கு அந்த பழைய மாடல் வீடு பிடிக்கவில்லை. ஊரில் மதிப்பாகவும், அலங்காரமாகவும் புதிய வீட்டில் வாழ ஆசைப்பட்டார். ஆகையால் பழைய வீட்டை முற்றாக இடித்துவிட்டு அதே இடத்தில் பல லட்ச ரூபாய் செலவில் புதிய வீட்டை கட்டிவிட்டார். இச்செயலை என்னவென்று கூறுவது? தன் தகப்பனார் கட்டிய வீட்டில் சிறுசிறு திருத்தங்களைச் செய்து அவர் நினைவாக தன் குடும்பத்தினரோடு வாழ்ந்தால் எவ்வளவு சிறப்பாக இருந்திருக்கும்? அல்லது வேறொரு இடத்தில் ஒரு புதிய வீட்டைக் கட்டியிருந்தாலும் பரவாயில்லை! தற்காலத்தில் முஸ்லிம்களின் ஆடம்பரம் எல்லைக் கடந்து விட்டதை மேற்கூறிய ஒரு உதாரணத்தைக் கொண்டே அறியலாம்.

முதலில் ஒவ்வொரு முஸ்லிமும் – ஆணாகட்டும் அல்லது பெண்ணாகட்டும் – தனது ஆசையென்ன? வாழ்க்கைக்கு தேவையானவை என்னென்ன? என்று உணர்ந்துக் கொள்ளவேண்டும். மறுமை நாளை நம்பிக்கைக் கொண்டுள்ள ஒரு முஸ்லிம் இந்த ஒன்றை மட்டும் நன்கு உணர்ந்துக் கொண்டால் இவ்வுலகில் எல்லாவற்றையும் அனுபவித்துக் கொண்டும், அதேசமயம் வீண்விரயமும் செய்யாமலும் இறைவனுடைய உவப்பைப் பெற்று வாழலாம். நமது ஆசைகள்  எவை, தேவைகள் எவை என்பதை எப்படி அறிந்துக் கொள்வது? அதை அடுத்த பகுதியில் (PArt-2) இன்ஷா அல்லாஹ் காண்போம்.

தொழுகையை விடுவது மிகப்பெரிய பாவமாகும்!

எழுதியவர்/பதிந்தவர்/உரை:சகோதரர் M. அன்வர்தீன்

“நம்பிக்கை கொண்டோர் மீது தொழுகையானது நேரம் குறிக்கப்பட்ட கடமையாகவுள்ளது” (அல்-குர்ஆன் 4:103)

ஆனால், இவர்களுக்குப் பின் (வழி கெட்ட) சந்ததியினர் இவர்களுடைய இடத்திற்கு வந்தார்கள்; அவர்கள் தொழுகையை வீணாக்கினார்கள்; (இழிவான மன)இச்சைகளைப் பின்பற்றினார்கள்; (மறுமையில்) அவர்கள் (நரகத்தின்) கேட்டைச் சந்திப்பார்கள். (அல்-குர்ஆன் 19:59)

தவ்பா செய்து, (பாவங்களிலிருந்து விலகி) ஈமான் கொண்டு, (ஸாலிஹான) – நல்ல – செயல்களைச் செய்கிறார்களே அவர்களைத் தவிர; அத்தகைய (ஸாலிஹான)வர்கள்; (ஜன்னத்தில்) – சுவர்க்கத்தில் பிரவேசிப்பார்கள்; (அவர்கள் அடைய வேண்டிய நற்பயன்) எதிலும் அவர்களுக்குக் குறைவு செய்யப்பட மாட்டாது. ” (அல்-குர்ஆன் 19:60)

இன்னும், (கவனமற்ற) தொழுகையாளிகளுக்குக் கேடுதான். அவர்கள் எத்தகையோர் என்றால் தம் தொழுகையில் பராமுகமாக(வும், அசிரத்தையாக)வும் இருப்போர். ” (அல்-குர்ஆன் 107:4-5)

ஈமான் கொண்டவர்களே! உங்கள் செல்வமும், உங்களுடைய மக்களும், அல்லாஹ்வின் நினைப்பை விட்டும் உங்களைப் பராமுகமாக்கிவிட வேண்டாம் – எவர் இவ்வாறு செய்கிறாரோ நிச்சயமாக அவர்கள்தாம் நஷ்டமடைந்தவர்கள். (அல்-குர்ஆன் 63:9)

குர்ஆன் விரிவுரையாளர்கள் மேற்கண்ட வசனங்களுக்கு விளக்கமளிக்கையில், பின்வருமாறு கூறினார்கள்.

இறைவனை நினைவு கூர்தல் என்று கூறப்பட்ட மேற்கூறிய வசனத்திற்கு ஐந்து நேரத் தொழுகையைக் குறிக்கிறது. யாராவது ஒருவர் கொடுக்கல் வாங்கல், தன்னுடைய குடும்பத்தினருக்காக சம்பாதிப்பது அல்லது தன்னுடைய குழந்தைகளுடன் இருப்பது போன்ற காரியங்களுக்காக தொழுகையை விட்டுவிடுவாரானால் அவர் நஷ்டத்திற்கு உள்ளானவராவார்.

மறுமையில் முதல் விசாரனை தொழுகையைப் பற்றியதாகும்: -

அபூஹுரைரா رَضِيَ اللَّهُ عَنْهُ அறிவிக்கிறார்கள்: -

நபி صلى الله عليه وسلم அவர்கள் கூறினார்கள்: மறுமையில் ஒரு மனிதனின் அமல்களைப் பற்றி விசாரிக்கப் படும்போது தொழுகையைப் பற்றியே முதன் முதலாக விசாரிக்கப்படும். அது சீராக அமைந்து விடுமேயானால் ஏனைய அனைத்து வணக்க வழிபாடுகளும் சீராகவே அமையும். அது சீராகவில்லையென்றால் ஏனைய அனைத்தும் சீரற்றதாகவே இருக்கும். (ஆதாரம்: ஸுனன் அபூதாவுத்)

நரக வாசிகளைப் பற்றிக் குறிப்பிடும் போது அல்லாஹ் கூறுகிறான்: -

‘உங்களை ஸகர் (நரகத்தில்) நுழைய வைத்தது எது?’ (என்று கேட்பார்கள்.) அவர்கள் (பதில்) கூறுவார்கள்: ‘தொழுபவர்களில் நின்றும் நாங்கள் இருக்கவில்லை. ‘அன்றியும், ஏழைகளுக்கு நாங்கள் உணவும் அளிக்கவில்லை. ‘(வீணானவற்றில்) மூழ்கிக்கிடந்தோருடன், நாங்களும் மூழ்கிக்கிடந்தோம். ‘இந்த நியாயத் தீர்ப்பு நாளை நாங்கள் பொய்யாக்கிக் கொண்டும் இருந்தோம். ‘உறுதியான (மரணம்) எங்களிடம் வரும்வரையில் (இவ்வாறாக இருந்தோம்’ எனக் கூறுவர்). (அல்-குர்ஆன் 74:42-47)

தொழுகையை விடுவது இறை நிராகரிப்பு: -

அல்லாஹ் கூறுகிறான்: -

நீங்கள் அவன் பக்கமே திரும்பியவர்களாக இருங்கள்; அவனிடம் பயபக்தியுடன் நடந்து கொள்ளுங்கள்;தொழுகையையும் நிலை நிறுத்துங்கள்; இன்னும் இணைவைப்போரில் நீங்களும் ஆகி விடாதீர்கள். (அல்குர்ஆன் 30:31)

நபி صلى الله عليه وسلم அவர்கள் கூறினார்கள்: -

ஒரு முஸ்லிமுக்கும் இணைவைத்தலுக்கும், இறை நிராகரிப்புக்கும் இடையில் உள்ள வேறுபாடு தொழுகையை விடுவது தான். (ஆதாரம்: முஸ்லிம்)

முஸ்லிமுக்கும் காஃபிருக்கும் இடையே உள்ள உடன்படிக்கையே தொழுகை தான். அதனை எவன் விட்டு விடுகின்றானோ அவன் காஃபிராகி விட்டான். (ஆதாரம்: அஹ்மத் , திர்மிதி)

தொழுகையைத்தவிர மார்க்க விஷயத்தில் எதை விடுவதினாலும் ஒருவன் காஃபிராகிவிடுவான் என்று நபித்தோழர்கள் கருதவில்லை. (ஆதாரம்: திர்மிதி)

“நிராகரிப்புக்கும் இஸ்லாத்திற்கும் இடையேயுள்ள வித்தியாசம் தொழுகையே. எவன் அதனை விடுகின்றானோ நிராகரித்தவனாகின்றான்” (ஆதாரம்: இப்னு ஹிப்பான்)

அபூ தர்தா (ரலி) அவர்கள் கூறினார்கள்: ”எவனிடம் தொழுகை இல்லையோ அவனிடம் ஈமான் இல்லை”

தொழுகையைத்தவிர மார்க்க விஷயத்தில் எதை விடுவதினாலும் ஒருவன் காஃபிராகிவிடுவான் என்று நபித்தோழர்கள் கருதவில்லை. ஆதாரம்: திர்மிதி

தொழாதவர்களின் நோன்பு, தர்மம் போன்ற நற்செயல்கள் ஏற்றுக்கொள்ளப்படாது: -

“அவர்களுடைய தானங்கள் ஏற்றுக் கொள்ளப்படாது என்று (அல்லாஹ்) தடுத்திருப்பதற்குக் காரணம் யாதெனில்; அவர்கள் அல்லாஹ்வையும், அவன் தூதரையும் நிராகரித்தார்கள்; மேலும் மிகச் சடைந்தவர்களாகவேயன்றி தொழுகைக்கு அவர்கள் வருவதில்லை. இன்னும் அவர்கள் வெறுப்புடனேயன்றி தானங்கள் செய்வதில்லை” (அல் குர்ஆன் 9:54)

யார் ஒருவர் வேண்டுமென்றே தொழுகையை விட்டுவிடுகிறாரோ அவர் அல்லாஹ்விடத்திலே எதையும் அடைய இயலாது(இப்னுமாஜா)

தொழுகையை நிலைநாட்டுபவர்கள் மட்டுமே மார்க்கத்தில் சகோதரர்கள்: -

‘அவர்கள் தவ்பாச் செய்து (திருந்தி), தொழுகையை நிலைநாட்டி, ஜக்காத்தும் கொடுத்தால் அவர்கள், மார்க்கத்தில் உங்கள் சகோதரர்களே’ (அல்-குர்ஆன் 9:11)

‘மனிதர்கள், வணக்கத்திற்குத் தகுதியானவன் அல்லாஹ்வையன்றி வேறுயாருமில்லை; முஹம்மத் இறைத்தூதர் என்று உறுதியாக நம்பி, தொழுகையை நிலை நிறுத்தி, ஸகாத்தும் கொடுக்கும் வரை அவர்களுடன் போரிட வேண்டும் என்று நான் கட்டளையிடப்பட்டுள்ளேன். இவற்றை அவர்கள் செய்து விடுவார்களானால் தம் உயிர், உடைமைகளை என்னிடமிருந்து பாதுகாத்துக் கொள்வார்கள். இஸ்லாத்தின் வேறு உரிமைகளில் (அவர்கள் வரம்பு மீறனாலே) தவிர! மேலும் அவர்களின் விசாரணை இறைவனிடமே உள்ளது’ என்று இறைத்தூதர்(ஸல்) அவர்கள் கூறினார்கள்” என அப்துல்லாஹ் இப்னு உமர்(ரலி) அறிவித்தார். (ஆதாரம்: புகாரி)

கருணையாளனாகிய அல்லாஹ் நம் குற்றங்களை மன்னித்து முஸ்லிமான நம் அனைவைரயும் தொழுகையை முறைப்படி பேணி நடப்பவர்களாக ஆக்கியருள்வானாகவும்.

நவீன முஃப்திகளும் நூதன ஃபத்வாக்களும்!

எழுதியவர்/பதிந்தவர்/உரை:நிர்வாகி

அகிலங்களின் இறைவனாகிய அல்லாஹ்வுக்கே அனைத்துப் புகழும் உரித்தானது.

அன்பு சகோதர, சகோதரிகளே அஸ்ஸலாமு அலைக்கும் வரஹ்மத்துல்லாஹ்

அல்லாஹ் கூறுகிறான்: -

இன்னும், ஜின்களையும், மனிதர்களையும் அவர்கள் என்னை வணங்குவதற்காகவேயன்றி நான் படைக்கவில்லை.(அல்குர்ஆன் 51:56)

“வணங்குவதற்காகவேயன்றி நான் படைக்கவில்லை” என்ற வாசகத்தை கவனமாக நோக்குகின்ற போது நமக்கு ஒரு பேருண்மை விளங்கும். அதாவது மனிதர்களின் வேலை இறைவனை வணங்குவதாக மட்டும் தான் இருக்க வேண்டும். வேறு எந்த வேலையும் அவன் செய்யக்கூடாது. அப்படியென்றால் அவன் இவ்வுலகில் வாழ்வது எவ்வாறு என்ற கேள்வி எழலாம். ‘வணக்கம் – இபாதத்’ என்பதன் பொருள் அறியாததால் தான் இத்தகைய சந்தேகங்கள்  வருகின்றது.

ஒரு முஸ்லிம் தன்னுடைய வாழ்க்கையை, இறைவன் தன் திருமறையில் கூறிய சட்ட திட்டங்களுக்கு ஏற்பவும் அவனது தூதர் (ஸல்) அவர்களின் வாழ்க்கை நெறிமுறைகளுக்கு ஏற்பவும் அமைத்துக் கொண்டு வாழ்வானானால் அதுவே இபாதத் ஆகிவிடுகிறது. இன்னொரு வகையில் சுருக்கமாக கூறுவதென்றால், ஒரு மனிதன் திருமறை மற்றும் நபிவழிக்கேற்ப,‘ஏவல் – விலக்கல்களை’ கடைபிடித்து வாழ்ந்தால், ‘ஹராம் – ஹலால்’ ஆகியவற்றை முறையே பேணி நடந்தால் அதுதான் அவன் தன் இறைவனை வணங்குவதாகும். இவ்வாறு அவன் தன் வாழ்நாள் முழுவதும் அமைத்துக்கொள்ளும் போது அவன் வாழ்நாளை இவைனை வணங்கியவனாக கழித்தவனாகின்றான்.

ஹலால் – ஹராமை தீர்மானிப்பது யார்?

ஒருவன், ஏவல்-விலக்கல்களை, ஹலால்-ஹராமை தன்னுடைய வாழ்வில் முறையாகப் பேணி நடந்தால் அதுவே ‘வணக்கம் – இபாதத்’ எனும் போது அந்த இபாதத்தையும் இறைவன் ஒருவனுக்கே செய்ய வேண்டும். வேறு வகையில் கூறுவதானால், ஹராம்-ஹலால் என்பதை தீர்மானிக்கும் ஏக உரிமை அல்லாஹ்வுக்கே முற்றிலும் உரியது என்றும் விளங்க முடியும்.

ஹராமை ஹலாலாகவும், ஹலாலை ஹராமாகவும் ஆக்குவது இறைவனுக்கு இணை கற்பிப்பது போன்றதாகும்!

இன்று நமது சமூகத்தில் பரவலாகக் காணப்படக்கூடிய மாபெரும் தீமைகளுல் ஒன்றாக இது விளங்குகின்றது. சிலர் போதிய மார்க்க அறிவின்மையாலும், தங்களின் மனோ இச்சைகளுக்கு கட்டுப்பட்டும், இன்னும் சிலர் இறை நிராகரிப்பாளர்களின் செல்வ செழிப்பில் மயங்கியவர்களாக அவர்களைப் போல நாமும் வாழ வேண்டும் என்ற பேராவலில் இறைவன் ஹராம் என்றதைக் கூட ஹலால் என்றோ அல்லது இறைவன் கூறுவது வேறு; இன்றைய நடைமுறையில் உள்ளது வேறு என்றெல்லாம் எவ்வித அடிப்படை ஆதாரமும் இல்லாமல் சுயவிளக்கம் கொடுத்து தம்முடைய மனோ இச்சைகளுக்கு வழிபட்டவர்களாக, இறைவன் திட்டவட்டமாக ஹராம் எனக்கூறியதைக் கூட ஹலால் ஆக்குவதற்கு முற்படுகின்றனர். இன்னும் சிலரோ மத்ஹபுகளின் பெயரால் முன்னோர்களைக் கண்மூடித்தனமாகப் பின்பற்றி,  கண்ணியமிக்க இமாம்களின் பெயரைப் பயன்படுத்தி அல்லாஹ் ஆகுமானதாக்கியதைக் கூட ஹராம் எனத் தடுத்துக் கொள்கின்றனர்.

அல்லாஹ் ஹராமாக்கியவற்றை ஹலாலாகவும் அல்லாஹ் ஹலாலாக்கியவற்றை ஹராமாகவும் ஆக்கும் ஒருவரின் இத்தைகய செயல்களை மற்றவர்கள் மனமுவந்து ஏற்று அதைப் பின்பற்றுவது என்பது  மிகப் பெரும் பாவமாகிய இறைவனுக்கு இணைவைத்தலுக்கு ஒப்பானது ஆகும் என்பதையும் நாம் உணர வேண்டும். ஹலால், ஹராம் ஆக்குகின்ற இந்த உரிமை அல்லாஹ்வை தவிர மற்றவருக்கும் இருக்கிறது என்று நம்புவதை அல்லாஹ் மிகப் பெரும் இணைவைப்பு என பின்வரும் வசனத்தில் கூறியுள்ளான்:

“அவர்கள் அல்லாஹ்வை விட்டும் தம் பாதிரிகளையும், தம் சந்நியாசிகளையும் மர்யமுடைய மகனாகிய மஸீஹையும் தெய்வங்களாக்கிக் கொள்கின்றனர்; ஆனால் அவர்களே ஒரே இறைவனைத் தவிர (வேறெவரையும்) வணங்கக்கூடாதென்றே கட்டளையிடப்பட்டுள்ளார்கள்; வணக்கத்திற்குரியவன் அவனன்றி வேறு இறைவன் இல்லை – அவன் அவர்கள் இணைவைப்பவற்றை விட்டும் மிகவும் பரிசுத்தமானவன்” (9:31)

இந்த வசனத்திற்கு பின்வரும் ஹதீஸ் மூலம் நாம் விளக்கம் பெறலாம்.

(முன்பு கிறிஸ்தவராக இருந்த) அதிய்யுப்னு ஹாதிம் (ரலி) இந்த வசனத்தை நபி (ஸல்) அவர்கள் ஓதிடக் கேட்டபோது அந்த மக்கள் அவர்களை (பாதிரிகளையும், துறவிகளையும்) வணங்கிக் கொண்டிருக்கவில்லையே என்று கூறினார். அதற்கு நபி (ஸல்) அவர்கள், சரிதான்! ஆனால் அந்த பாதிரிகளும், துறவிகளும் அல்லாஹ் ஹராமாக்கியவற்றை ஹலால் என்றும், அல்லாஹ் ஹலாலாக்கியவற்றை ஹராம் என்றும் கூறும்போது அவர்களும் அவ்வாறு ஏற்றுக் கொண்டார்களே! அதுதான் அவர்களை அவர்கள் வணங்குவதாகும். (என்று கூறினார்கள்) (திர்மிதி, பைஹகி)

திருமறை மற்றும் எவ்வித நபிமொழி ஆதாரமில்லாமல் தம் மனோஇச்சைகளின் அடிப்படையில் ஒருவர் அல்லாஹ் ஹலால் என்றதை ஹராமாகவோ அல்லது அல்லாஹ் ஹராமாக்கியதை ஹலால் ஆகவோ மாற்றிக் கூறுபவர்களை ஒட்டுமொத்தமாகப் புறக்கணிக்காமல் அவர்கள் கூறுவதை ஏற்றுக்கொள்வது என்பதும் இணைவைப்பே என்பதை மேற்கண்ட வசனம் மற்றும் ஹதீஸ் மிகத் தெளிவாகவே  விளக்குகின்றது.

ஹலால் – ஹராமை தீர்மானிக்கும் உரிமை அல்லாஹ்வின் தூதர் (ஸல்) அவர்களுக்கு உண்டா?

தம் மனைவியின் திருப்தியை நாடி தேன் சாப்பிடமாட்டேன் என்று கூறிய நபி (ஸல்) அவர்களிடம் அல்லாஹ் பின்வரும் கேள்வியை எழுப்பியதை நாம் அறிந்திருக்கின்றோம்.

“நபியே! உம் மனைவியரின் திருப்தியை நாடி, அல்லாஹ் உமக்கு அனுமதித்துள்ளதை ஏன் விலக்கிக் கொண்டீர்? மேலும் அல்லாஹ் மிகவும் மன்னிப்பவன், மிக்க கிருபையுடையவன்” (66:1)

நபி (ஸல்) அவர்களுக்கே அல்லாஹ் ஹலாலாக்கியதை எவ்வாறு தடை செய்து கொள்ள முடியும்? என்று கூறி அல்லாஹ் கேள்வி எழுப்பினால் நம்மவர்களின் நிலை என்ன என்பதை நாம் சற்று சிந்திக்க வேண்டும்.

மேலும் அல்லாஹ் கூறுகின்றான்:

(நபியே!) நீர் கூறும்: ‘அல்லாஹ் உங்களுக்கு இறக்கிவைத்த ஆகாரங்களை நீங்கள் கவனித்தீர்களா? அவற்றில் சிலவற்றை ஹராமாகவும், சிலவற்றை ஹலாலாகவும் நீங்களே ஆக்கிக் கொள்கிறீர்கள்! (இப்படித் தீர்மானித்துக் கொள்ள) அல்லாஹ் உங்களுக்கு அனுமதி அளித்துள்ளானா? அல்லது அல்லாஹ்வின் மீது நீங்கள் பொய்க்கற்பனை செய்கின்றீர்களா?’ (10:59)

இன்றைய காலகட்டத்திலே நம்மில் சிலர், ஏன் குர்ஆன் ஓதத் தெரியாதவர்கள் கூட நாங்கள் ஏகத்துவத்தைப் பின்பற்றுபவர்கள் எனக் கூறிக்கொண்டு, சிலர் கூறுவதை கண்மூடித்தனமாகப் பின்பற்றி, எவ்வித மார்க்க அறிவுமின்றி சில விஷயங்களில் ‘ஹலால்-ஹராம்’ என ஃபத்வா கொடுக்க ஆரம்பித்து விடுகின்றனர். எந்த அடிப்படையில் இவ்வாறு கூறுகிறீர்கள் என்று கேட்டால் பதில் கூட சொல்லத் தெரியாது! இவ்வாறு ஃபத்வா கூறுவது எத்தகைய விபரீதமான செயல் என்பதை இவர்கள் சிறிதும் உணர்வதில்லை. இது தற்போது நம்மர்களைப் படித்திருக்கின்ற மிகப்பெரிய கேடு! இவர்கள் மேற்கண்ட திருமறை வசனங்களையும், நபிமொழிகளையும் சற்று கவனமாகப் படித்து தெளிவு பெற வேண்டுகிறேன்.

அதேபோல, சிலர் குர்ஆன் மற்றும் ஹதீதுகளின் அடிப்படையில் ஒரு சிலவற்றை இறைவன் ஹராம் எனத் தடுக்கிருக்கின்றான் என நன்கு அறிந்திருக்கின்ற நிலையில், ஷைத்தானின் மாயவலையில் சிக்குண்டு, இறைவனின் மேற்கூறப்பட்ட எச்சரிக்கைகள் மறக்கடிக்கப்பட்ட நிலையில், தம் மனோ இச்சகைகளைப் பின்பற்றியவர்களாக, பெரும்பாண்மையானவர்களின் விருப்பங்களை நிறைவேற்றுவதற்காகவும், பிறரிடம் கண்ணியம் தேடியும், அழியக் கூடிய அற்பபொருளாதாரத்தை அடைய வேண்டியும், மார்க்கத்தில் இவை பற்றி தெளிவாக விளக்கப்படவில்லை என்றெல்லாம் காரணம் கூறி அவற்றை ஹலாலாக்க முற்படுவர். இவர்களின் கூற்றுக்கு மார்க்கத்தில் போதிய ஆதாரமோ அல்லது நபி (ஸல்) அவர்களின் வழிமுறைகளிலே தெளிவான சான்றுகளோ எதுவும் இருக்காது! இருப்பினும் ஷைத்தான், இந்த ஹராமான செயல்களை அவர்களுக்கு அழகாக்கி அவர்களை அதைப் பின்பற்றுமாறு செய்யவைக்க முயற்சிப்பதோடு அவர்கள் மூலம் பிறரையும் இந்த வழிகேட்டைப் பின்பற்ற வைத்து மாபெரும் வழிகேட்டின் பக்கம் அவர்களை அழைத்துச் செல்கிறான்.

ஏகத்துவ வாதிகளைப் பொருத்தவரை ‘ஷிர்க்’ வைத்தால் தான் நிரந்தர நரகம்! மற்ற பாவங்களை அல்லாஹ் மன்னிக்க கூடியவனாக இருக்கின்றான் என்ற அதீதமான நம்பிக்கையில் இருக்கின்றார்கள். ஆம் உண்மைதான்! அல்லாஹ் இணைவைப்பைத் தவிர ஏனைய பாவங்களை தான் நாடியோருக்கு மன்னிப்பதாக வாக்களித்திருக்கின்றான்!

ஆனால் என்ன பரிதாபம்! அல்லாஹ் ஹராமாக்கியதை ஹலால் எனக் கூறுபவரை பின்பற்றினால் அவரை வணங்கிய குற்றத்திற்கு ஆளாவோம் என்பதைக்கூட இந்த ஏகத்துவவாதிகள் ஏனோ உணர்வதில்லை! மத்ஹப் வாதிகள் ஹலால்-ஹராம் விசயத்தில் திருமறை மற்றும் நபிவழிக்குப் பதிலாக இமாம்களைப் பின்பற்றுவதாகக் கூறிக்கொண்டு அவர்களுக்கு அறிவுரை கூறும் போது இதுபற்றிய வசனம் (9:31) மற்றும் நபிமொழியை ஆதாரமாக கூறும் இவர்கள், ஏனோ தம்முடைய வாழ்வில் பின்பற்றுவதில்லை!

இன்னும் சிலரோ தர்க்கரீதியாக வாதாட முற்படுவர். அதாவது ஒரு குறிப்பிட்ட விசயத்தின் நவீன பெயரைக் குறிப்பிட்டு இவற்றை இறைவன் ஹராம் எனத் தடுக்கவில்லை! எனவே நாமும் அதை ஹராம் என்று கருத தேவையில்லை! எனக் கூறுவர். ஒரு முக்கியமான விசயத்தை இவர்கள் கவனிக்கத் தவறிவிடுகின்றனர். இவர்கள் குறிப்பிடும் அந்த விசயத்தில் இறைவன் தடைசெய்த அம்சம்கள் நிறைந்திருக்குமானால் அதுவும் தடைசெய்யப்பட்டதாகவே அமையும். அவைகளை நாம் எந்தப் பெயர்களில் அழைத்தாலும் சரியே!

உதாரணமாக, தற்போது குறிப்பாக தமிழகத்தில் நடைமுறையில உள்ள சினிமாவை எடுத்துக் கொண்டால் அவற்றில் இஸ்லாம் தடை செய்திருக்கின்ற விபச்சாரத்தைத் தூண்டுகின்ற ஆபாசம், வன்முறை, கொலை, கொள்ளை, கற்பழிப்புகள், இசை இன்னும் ஏராளமான மார்க்கத்திற்கு முரணான காரியங்கள் இடம் பெற்றிருப்பதால் நிச்சயமாக இவ்வகையான சினிமாக்களை மார்க்கத்தில் அனுமதி உள்ளதாக ஒருபோதும் கருதமுடியாது.  மேலும் அல்லாஹ்வையும் மறுமை நாளையும் உறுதியாக நம்புகின்ற முஃமினான ஒருவர், ‘விபச்சாரத்தின் அருகில் கூட நெருங்காதீர்கள்’ என்ற இறைவனின் கட்டளைக்கேற்பவும் இன்னும் பல திருமறை வனங்களின் எச்சரிக்கைகளுக்கேற்ப இவற்றை விட்டும் முற்றுமுழுதாக விலகியிருக்க வேண்டும்.

நபி (ஸல்) அவர்கள் கூறியுள்ளார்கள்:

‘ஹலால் என்னும் அனுமதிக்கப்பட்டது தெளிவானது; ஹராம் என்னும் விலக்கப்பட்டதும் தெளிவானது; அவ்விரண்டிற்குமிடையே சந்தேகத்திற்கிடமான காரியங்கள் உள்ளன. பாவம் எனச் சந்தேகப்படுபவற்றை விட்டுவிடுகிறவர் பாவம் என்று தெளிவாகத் தெரிவதை நிச்சயம் விட்டுவிடுவார்; பாவம் எனச் சந்தேகப்படுபவற்றைச் செய்யத் துணிகிறவர் தெளிவான பாவங்களிலும் வீழ்ந்து விடக் கூடும். பாவங்கள் அல்லாஹ் போட்ட வேலிகளாகும். வேலியைச் சுற்றி மேய்கிறவர் அதற்குள்ளும் சென்று விடக்கூடும்’ என்று இறைத்தூதர்(ஸல்) அவர்கள் கூறினார்கள்.அறிவிப்பவர்: நுஃமான் இப்னு பஷீர்(ரலி); நூல்: புகாரி

ஹராமான விசயங்கள் பலவற்றை தன்னுள்ளே ஒட்டுமொத்தமாக இத்தகைய சினிமாக்கள் அடக்கியுள்ளதால் இவையும் ஹராம் எனும்போது, இதற்கு ஆதரவு தருவதோ அல்லது இவற்றை நமது பத்திரிக்கைகளிலோ அல்லது இணைய தளங்களில் பிரசுரிப்பது அல்லது பதிவதன் மூலம் அவற்றிற்கு விளம்பரம் தேடித்தருவதோ கூடாது என்பதை மிகத்தெளிவாகவே அறியலாம்! ஆனால், இறைவனின் எச்சரிக்கைகளையெல்லாம் உதாசீனம் செய்து, வரம்பு மீறியவர்களாக, அற்ப இவ்வுல வாழ்க்கையின் வெற்றியையே முக்கிய குறிக்கொளாகக் கொண்டு இவற்றை நாம் செய்கின்ற வேளையில், இறைவனால் தடை செய்யப்பட்ட தீமைகளை ஒட்டு மொத்தமாக உள்ளடக்கிய இந்த சினிமாவை நாம் அங்கீகரித்து அவற்றிக்கு ஆசிர்வாதம் வழங்கியது போலாகும். நம்முடைய இத்தகைய செயல்களினால் முஸ்லிம் ஒருவர் வழிதவறிச் சென்றால் அவரின் பாவமூட்டைகளையும் நாம் மறுமையில் சுமக்க வேண்டிவரும் என்பதை நாம் மறந்து விடக்கூடாது.

அல்லாஹ் கூறுகின்றான்:

“கியாம நாளில் அவர்கள், தங்கள் (பாவச்) சுமைகளை முழுமையாக சுமக்கட்டும்! மேலும் அறிவில்லாமல் இவர்கள் எவர்களை வழி கெடுத்தார்களோ, அவர்களுடைய (பாவச்) சுமைகளையும் (சுமக்கட்டும்)! இவர்கள் (சுமக்கும்) சுமை மிகவும் கெட்டதல்லவா?” (16:25)

ஹராமானவைகள் தான் அல்லாஹ்வின் வரம்புகளாகும்; அல்லாஹ் விதித்த வரம்புகளை மீறாதீர்கள்:

அல்லாஹ் கூறுகிறான்:

“எவன் அல்லாஹ்வுக்கும், அவன் தூதருக்கும் மாறு செய்கிறானோ, இன்னும் அவன் விதித்துள்ள வரம்புகளை மீறுகிறானோ அவனை நரகில் புகுத்துவான்! அவன் அங்கு (என்றென்றும்) தங்கி விடுவான்! மேலும் அவனுக்கு இழிவான வேதனையுண்டு.” (4:14).

நபி (ஸல்) அவர்கள் கூறியுள்ளார்கள்:

‘நான் உங்களுக்கு எதைத் தடுத்துள்ளேனோ அதை விட்டும் தவிர்ந்து கொள்ளுங்கள். நான் உங்களுக்கு எதை ஏவியுள்ளேனோ அதை முடிந்த அளவு செய்யுங்கள்’. அறிவிப்பவர்: அபூஹுரைரா (ரலி), நூல்: முஸ்லிம்.

எனவே அன்பு சகோதர, சகோதரிகளே மேற்கண்ட திருமறை வசனங்கள், ஹதீஸ்கள் மற்றும் விளக்கங்களிலிருந்து நாம் பெறும் தெளிவு என்னவெனில்,

• இறைவன் விதித்த ஹராம் மற்றும் ஹலாலைப் பேணுவதும் வணக்கமாகும்
• இறைவன் ஹராம் என்று விலக்கியிருப்பதை மீறுவது இறைவனின் வரம்பை மீறியதாகும்
• இறைவனின் வரம்புகளை மீறியோருக்கு கடுமையான தண்டனைகள் இருக்கின்றது
• ஒருவர் இறைவன் ஹலால்-ஹராம் என விதித்திருப்பதை தம் சுய விருப்பத்திற்கு இணங்க, மனோ இச்சைகளுக்கு கட்டுப்பட்டவராக இறைவனின் வரம்புகளான ஹராம் – ஹலால் என்பதை மாற்றியமைப்பது இறை நிரகாரிப்பு ஆகும்
• ஒருவர் இவ்வாறு மாற்றியமைத்ததைப் பின்பற்றுவது அவரை வணங்குவது போலாகும். இது மாபெரும் பாவமாகிய இணைவைப்பு ஆகும். இது இறைவன் நம்மைப் படைத்த நோக்கமான அல்லாஹ்வை வணங்குவதை விட்டும் பிறரை வணங்கியதாக ஆகிவிடும். (அல்லாஹ் நம் அனைவரையும் காப்பாற்றுவானாக)
• தவறான வழிகாட்டுதலின் மூலமாக ஒருவர் வழிதவறிச் சென்றால் மறுமையில் அவருடைய பாவச் சுமையயையும் தம்முடையதுடன் சேர்த்து சுமக்க நேரிடும்.
• இறைச்சட்டங்களில் விளையாடுவோர்களை நாம் புறக்கணித்து அல்லாஹ்விடம் பாதுகாவல் கோரியவர்களாக திருமறையையும், அல்-குர்ஆனின் வழிமுறைகளையும் பின்பற்றி வாழ்வதற்கு முயற்சிக்க வேண்டும்.

கருனையாளனான அல்லாஹ் ஹலால், ஹராம் என விதித்த வரம்புகளை மீறாதவர்களாக அவனுக்கே முற்றிலும் கட்டுப்பட்டு வாழ்வதன் மூலம் அவனையே வணங்குபவர்களாக நம் அனைவரையும் ஆக்கியருள்வானாகவும். ஆமீன்.

அல்லாஹ்வே முற்றிலும் அறிந்தவன்.